د لوړو زده کړو وزارت علمي معین په مشرۍ د هېواد په پوهنتونونو کې د علمي څېړنو مرکزونو، کتابتونونو، لابراتوارونو، ملي او نړیوالو ژورنالونو د ترتیب او تجهیز په موخه انلاین ناسته وشوه.
په یاده ناسته کې د لوړو زده کړو وزارت د تحقیق، تألیف او ژباړې، مالي او حسابي او تدارکاتو رئیس صاحبانو هم حضور درلود او د مرکزي او ولایاتونو د تحصیلي بنسټونو مسؤلینو په انلاین بڼه برخه پکې اخیستې وه. په پیل کې د لوړو زده کړو وزارت علمي معین دوکتور لطف الله خیرخواه د هېواد په تحصیلي بنسټونو کې د علمي مرکزونو او ملي او نړیوالو ژورنالونو پر ارزښت خبرې وکړې.
نومړي زیاته کړه: «په یوه تحصیلي بنسټ کې د علمي او څېړنیزو مرکزونو د نشت په صورت کې یاد تحصیلي بنسټ له خپل اصلي مسیر څخه، چې د علم او څېړنو تولید دی، منحرفوي او یوازې په یوه تدریسي بنسټ یې بدلوي.»
د لوړو زده کړو وزارت علمي معین وویل، چې دغه وزارت د هېواد د پوهنتونونو د کتابتونونو، لابراتوارونو، ملي او نړیوالو ژورنالونو د تجهیز لپاره لازمه بودجه په پام کې نیولې او تحصیلي بنسټونه کولی شي، چې خپلې اړتیاوې ورسره شریکې کړي.
همداراز دوکتور لطف الله خیرخواه د هېواد د پوهنتونونو له مسؤلینو وغوښتل چې د لومړیتوب لرونکو پروژو پروپوزلونه لوړو زده کړو وزارت ته راولېږي، تر څو یې د بودجې په برخه کې لازم اقدامات وشي.
همدارنګه په یاده ناسته کې د تحقیق، تألیف او ژباړې، مالي او حسابي او تدارکاتو رئیس صاحبانو د یادو برخو د تدارکاتي، مالي او اداري پروسې پر تکمیل او چټکتیا ټینګار وکړ او د دغې پروسې د تدارکاتي څرنګوالي په اړه یې د تحصیلي بنسټونو مسؤلینو ته معلومات ورکړل.
نوموړو د هېواد د تحصیلي بنسټونو له رئیس صاحبانو وغوښتل، چې د ۱۴۰۱ مالي کال د حسابونو د تکمیل په برخه کې ژر تر ژره لازمې کړنې تر سره کړي.
په پای کې د هېواد د دولتي تحصیلي بنسټونو مسؤلینو پوښتنو ته ځوابونه وویل شول.
