د لوړو زده کړو وزارت مرکزي ادارو تشکیلاتي جوړښت بیاکتنې کمېټې نوبتي غونډه جوړه شوه
د لوړو زده کړو وزارت مرکزي ادارو تشکیلاتي جوړښت بیاکتنې کمېټې نوبتي غونډه نن د دغه وزارت د مالي او اداري معین په مشرۍ جوړه او د درېیو ریاستونو جوړښت طرحه تایید شوه.
د یادې کمېټې د غونډې په پیل کې د لوړو زده کړو وزارت مالي او اداري معین نور احمد درویش د هغو ریاستونو د تشکیلاتو اصلاح او نهایي کولو په برخه کې د بشري سرچینو ریاست کاري راپور واورېده چې په تېرو غونډو کې یې په اړه بحث شوی و.
ورپسې له اجنډا سره سم د دولتي محصلانو ریاست، د خصوصي محصلانو ریاست او اداري او زېربنا ریاست د جوړولو طرحې پر نهایي کولو بحث وشو چې تر یو لړ لازمو اصلاحاتو وروسته تایید شوه.
همدارنګه په یاده غونډه کې د څېړنو او نوښت رامنځته کولو نوي عمومي ریاست د جوړښت طرحه هم غونډې ته وړاندې شوه چې تر هر اړخیزو بحثونو او د متخصصانو څرګندونو وروسته په پرنسیپ کې تایید شوه او د بشري سرچینو ریاست ته هدایت ورکړل شو چې د یادې طرحې مسوده د لا زیات غور په موخه د لوړو زده کړو وزارت علمي معینیت سره شریکه کړي.
