د لوړو زده کړو وزارت پلاوى د بدخشان پوهنتون د علمي، تدريسي او اداري فعاليتونو او د ۱۴۰۱ کال لپاره د نويو محصلينو د جذبولو د ظرفيت د کتنې په موخه له دغه پوهنتون څخه ليدنه وکړه.
دغه پلاوی چې مشري یې د لوړو زده کړو وزارت د خصوصي محصلینو رئیس انجنیر سید اسماعیل روحاني کوي، په داسې حال کې چې د لوړو زده کړو وزارت مالي او حسابي رئیس عبدالباري خپلواک او د دې وزارت د محصلینو چارو د همغږۍ امر انجنیر ویس الدین بریالي یې ملتیا کوي، د بدخشان ولایت ته سفر کړی دی.
ورغلي پلاوي د دغه ولایت د دولتي پوهنتون د رهبرۍ پلاوي، استادانو ، کارکوونکو سره د کتنې ترڅنګ، د دولتي پوهنتون بېلابېلې څانګې بررسي کړې او د ۱۴۰۱ کال لپاره د نویو محصلنو د جذبولو ظرفیت یې و ارزاوه.
یاد پلاوي همدارنګه، د علمي، تدریسي او اداري فعالیتونو څرنګوالی، د محصلینو لپاره د بدل اعاشې وېش، د کانکور آزموینې له لارې د محصلینو د جذب څرنګوالی او د دې اکاډمیکې ادارې ځینې ستونزې له نږدې ارزیابي او بررسي کړې.
په همدې ترتیب یاد پلاوي د بدخشان پوهنتون له رهبرۍ سره په یوه ناسته کې،
په علمي چاپېریال کې د اسلامي ارزښتونو د رعایتولو، د لوړو زده کړو وزارت د پروګرامونو او پالیسیو د تطبیق، د نویو محصلینو د جذبولو د څرنګوالي او نورو مسایلو په اړه بحث او خبرې وکړې او لازم تصمیمونه ونیول شول.
