د لوړو زده کړو وزير د ارزګان له والي سره وکتل
د ارزګان والي د لوړو زده کړو له وزیر او علمي مرستیال سره په بېلو بېلو لیدنو کې په دغه ولایت کې د لوړو زده کړو پر پیاوړتیا خبرې وکړې.
د دې کتنې په لړ کې د لوړو زده کړو وزیر ډاکټر عباس بصیر د ارزګان د لوړو زده کړو موسسې د پرمختګونو او ستونزو د حل په برخه کې د ځانګړې پاملرنې له امله د ارزګان له والي مننه وکړه.
د ارزګان والي محمد عمر شېرزاد د لوړو زده کړو له وزیر وغوښتل نوي پوهنځي جوړ کړي او د ارزګان د لوړو زده کړو موسسې ساختماني پروژو د مدیریت په برخه کې لا زیاته پاملرنه او همکاري وکړي چې د لوړو زده کړو د وزیر له لوري هم د هېواد له قوانینو سره سم د همکارۍ ژمنه ورکړل شوه.
د لوړو زده کړو وزیر وویل، د لوړو زده کړو وزارت د یاد ولایت تحصیلي بنسټونو د ساختماني پروژو د ستونزو پر اوارولو او په دې برخه کې د پانګونې له پاره د سیمه ییزو ولایتي چارواکو له جدي مرستو او همکاریو تود هرکلی کوي او په دې برخه کې به هېڅ ډول مرسته او همکاري ونه سپموي.
همدارنګه د ارزګان والي د وزارت له علمي مرستیال عبدالتواب بالاکرزي سره هم ولیدل او په ارزګان ولایت کې يې د لوړو زده کړو د وضعیت په اړه د معلومات ورکولو ترڅنګ د لوړو زده کړو وزارت له رهبرۍ وغوښتل چې د ارزګان د لوړو زده کړو موسسې پیاوړتیا ته پاملرنه وکړي.
د یادونې وړ ده چې د ارزګان د لوړو زده کړو موسسه په ۱۳۹۱ لمریز کال جوړه شوې چې دا مهال ۳پوهنځي، ۱۰ څانګې، ۱۲۷۱ زده محصلين او ۵۰ استادان لري.
