د لوړو زده کړو وزير د امريکايي پوهنتون د افغانستان څانګې له رهبري ډلې سره وکتل
د لوړو زده کړو وزير عباس بصير افغانستان کې د امريکايي پوهنتون له مشرتابه سره وکتل
په دې کتنه کې دواړو لورو د علمي او څېړنيزو فعاليتونو د ډېرېدو، د لوړو زده کړو په دولتي او خصوصي بنسټونو کې د افغانستان څانګې امريکايي پوهنتون له برياليو تجربو کار اخیستل، د لوړو زده کړو د نظام په برخه کې د همکاريو پياوړي کول، په لوړو زده کړو وزارت کې د تقنیني اسنادو د جوړولو لپاره د ياد پوهنتون همکاري او له علمي او څېړنيزو فرصتونو څخه په ګډې استفادې بحث وشو.
د لوړو زده کړو وزير ډاکټر عباس بصير د لوړو زده کړو په برخه کې د امريکا متحده ايالاتو د همکاريو ستاينې تر څنګ وويل چې د خصوصي او دولتي بنسټونو د کمي او کیفي وړتياوو لوړول او د هېواد د لوړو زده کړو د نظام پراختيا او څېړنو ته پاملرنه، د دې وزارت له لومړيتوبونو څخه دي.
ډاکټر عباس بصير افغانستان کې د امريکايي پوهنتون له رهبري ډلې وغوښتل چې د لوړو زده کړو د نوي مشرتابه د پروګرامونو د عملي کولو په برخه کې؛ چې د لوړو زده کړو د خصوصي او دولتي بنسټونو د ودې او پياوړتيا له پاره جوړ شوي دي هر اړخيزه همکاري وکړي.
د لوړو زده کړو وزير همداراز ترې وغوښتل چې د علمي معياري څېړنو د فرهنګ د دودولو لپاره د هېواد له خصوصي او دولتي بنسټونو سره له نږدې کار وکړي.
د امريکايي پوهنتون د افغانستان څانګې رييس ډېوېډ سېډني، له يادو طرحو څخه د ملاتړ تر څنګ ډاډ ورکړ چې د امريکايي پوهنتون د افغانستان څانګه تياره ده چې د افغانستان د لوړو زده کړو نظام د پياوړتيا او پراختيا په برخه کې له دې وزارت سره هراړخيزه همکاري وکړي.
