د لوړو زده کړو وزیر د لوګر لوړو زده کړو موسسې د استادانو او محصلینو ستونزې واورېدل
د لوړو زده کړو وزیر ډاکټر عباس بصیر د لوګر لوړو زده کړو موسسې د استادانو او محصلینو ستونزې او وړاندیزونه له نږدې واورېدل.
د لوړو زده کړو وزیر او د دغه وزارت د مالي او اداري چارو مرستیال نور احمد دروېش او ورسره پلاوي لوګر ولایت ته د خپل سفر پر مهال، د لوګر لوړو زده کړو موسسې استادانو او محصلینو سره د جلا جلا ناستو په لړ کې د هغوی ستونزې او وړاندیزونه واورېدل.
د لوګر والي عبدالقیوم رحیمي، په ولسي جرګه کې د لوګر د خلکو یوشمېر استازو، د لوګر لوړو زده کړو موسسې رییس او نورو چارواکو د لوړو زده کړو وزارت له مشرتابه او ورسره پلاوي څخه مننه وکړه چې یاد ولایت ته یې د تحصیلي ستونزو هوارولو او وړاندیزونو اورېدو په موخه سفر کړی دی.
د لوګر لوړو زده کړو موسسې رییس، استادانو او محصلینو د لوړو زده کړو وزیر او د مالي او اداري چارو مرستیال سره خپلې ستونزې؛ په ځانګړې توګه د مرکز او پوهنتون تر منځ غځېدلي سړک، د نجونو لیلیې، تشکیلاتي، امنیتي، د استادانو لپاره د اوسېدو ځای نشتون او دې ته ورته نورې ستونزې شریکې کړې او هغو ته یې د جدي پاملرنې غوښتنه وکړه.
د لوړو زده کړو وزارت مشرتابه د لوګر لوړو زده کړو موسسې مشرتابه، محصلینو او د یاد ولایت چارواکو او خلکو ته ډاډ ورکړ چې یادو ستونزو ته به ژر تر ژره رسېدنه وشي او له اړوندو ادارو سره به یې د هواري په موخه خبرې وکړي.
د لوړو زده کړو وزیر ډاکټر عباس بصیر ټینګار وکړ چې د معیاري لوړو زده کړو وړاندې کولو او د زده کړو کیفیت لوړولو لپاره باید استادان کار وکړي او دې برخه کې نوښتونه رامنځ ته کړي.
نوموړي د لوګر لوړو زده کړو موسسې محصلینو ته د وینا پر مهال وویل:"تاسو ټول د افغانستان سرمایه یئ او ټول هیواد ته به کار کوئ نه یوازې لوګر ته."
دا په داسې حال کې ده چې د لوړو زده کړو وزیر، د مالي او اداري چارو مرستیال او د یاد وزارت یوشمېر رییسانو نن لوګر ولایت ته رسمي سفر وکړ.
