د لوړو زده کړو وزیر د لوګر ولایت د ټولنیزو او کلتوري چارو مرستیالې سره وکتل
د لوړو زده کړو وزیر دوکتور عباس بصیر د لوګر ولایت د ټولنیزو او کلتوري چارو مرستیالې رابعې ستانکزۍ سره وکتل.
په دغه لیدنه کې، په داسې حال کې چې د لوګر ولایت د تخنیکي او سکټوري خدمتونو رییس غرني ګل ځاځي او د لوګر لوړو زده کړو موسسې مالي او اداري مرستیال عبدالمنیر مهرور هم شتون درلود، دواړو اړخونو په لوګر کې د تحصیلي خدمتونو وړاندې کولو او د دغه ولایت د لوړو زده کړو موسسې د پیاوړتیا په اړه خبرې وکړې.
د لوړو زده کړو وزیر دوکتور عباس بصیر د یادې موسسې د پراختیایي کارونو د څارنې له امله د لوګر ولایت له مرستیالې څخه مننه وکړه او په دې اړه یې د لوړو زده کړو وزارت پروګرامونو او د پراختیایي پروژو د پلي کولو په اړه معلومات وړاندې کړل. همدارنګه د جوړښت او منځپانګې له پلوه یې د لوړو زده کړو بنسټونو پرمختګ د لوړو زده کړو وزارت له لومړیتوبونو څخه وباله.
دوکتور عباس بصیر وویل؛ د لوګر لوړو زده کړو موسسې کورنۍ جادې او خوړنځای خونې تدارکاتي کارونو پرمختګ کړی او عملي کار به یې هم ډېر ژر پیل شي. دغه راز د یادې موسسې د انټرنېټ قوي کول او کتابتون معیاري کول هم د دغه وزارت په پلان کې دي.
