د لوړو زده کړو وزیر د پکتیکا پوهنتون محصلینو په فراغتغوڼده کې ګډون او وینا وکړه
د لوړو زده کړو وزیر محترم شیخ الحدیث مولوي نداء محمد ندیم پکتیکا ولایت ته د خپل رسمي سفر په ترڅ کې، د پکتیکا پوهنتون ۱۴۰۴هـ.ش کال محصلینو فراغتغونډه کې ګډون او وینا وکړه.
د لوړو زده کړو وزیر په یاده غونډه کې، چې د یاد ولایت والي مولوي عبدالخالق عابد، مرستیال والي، امنیه قومندان، د ولایتي ادارو مسؤلینو، د پکتیکا پوهنتون رهبري پلاوي، استادانو، اداري کارمندانو، فارغ التحصیلانو د هغوی د کورنیو غړو او مخورو سپین ږیرو ګډون کړی و، فارغو شویو محصلینو ته د فراغت مبارکۍ تر څنګ وویل چې د امکان په صورت کې په لېسانس زده کړو بسنه ونکړي، د ماسټري او دوکتورا زده کړې ترسره او ځانونه په تخصص کې پیاوړي کړئ.
محترم شیخ صاحب محصلینو ته سپارښتنه وکړه چې د خپل مسلک اړوند دندې ترسره کړي او د خپلو خلکو لپاره په اخلاص خدمت وکړي او له محصلینو یې وغوښتل چې خپل دوست او دښمن وپېژني، د دښمن فکري او عقیدوي جګړې ته متوجه اوسي.
همداراز، محترم شيخ صاحب په خپلو خبرو کې د پکتیکا ولسونو ته د دوی د ارزښتناکو خدمتونو او د افغانستان اسلامي امارت د نظام له ملاتړ څخه مننه وکړه. نوموړي د دغه ولايت له ولسونو د لا زیاتو همکاریو او حمايې غوښتنه وکړه. همدارنګه، محترم شيخ صاحب هغوی ته د اسلامي امارت سره د ښه محبت او ښه اطاعت توصیه وکړه او خپل منځي اتحاد او وحدت ته يې راوبلل.
نېټه: یکشنبه
۱۴۴۷هـ.ق، د صفرالمظفر ۳۰مه
۱۴۰۴هـ.ش، د زمري ۲مه
۲۰۲۵م، د اګېسټ ۲۴مه
