د لوړو زده کړو په وزارت کې د هغو تحصيلي موسسو د ستونزو د حل په موخه غونډه ترسره شوه چې تر اوسه د لوړو زده کړو وزارت د اعتبار ورکولو په پروسه کې نه دي شامل شوي.
د ۱۴۰۰کال د مرغومې ۷ مه
د لوړو زده کړو په وزارت کې د هغو تحصيلي موسسو د ستونزو د حل په موخه غونډه ترسره شوه چې تر اوسه د لوړو زده کړو وزارت د اعتبار ورکولو په پروسه کې نه دي شامل شوي.
دا غونډه د لوړو زده کړو وزارت د تضمین کیفیت او اعتبار ورکولو ریاست په نوښت د هغو تحصیلي بنسټونو چې تر اوسه د اعتبار ورکولو په لومړني پړاو کې نه دي شامل شوي د پوهاوي په موخه جوړه شوې وه، چې په کې د تحصیلي بنسټونو شاوخوا ۵۶ استازو په حضوري او انلاین بڼه ګډون کړی وو.
د غونډې په پيل کې د لوړو زده کړو وزارت علمي معین دوکتور لطف الله خېرخواه وويل، چې د هېواد د علمي پرمختګ لپاره اړېنه ده، چې د لوړو زده کړو وزارت پروګرامونه او معيارونه د دولتي او خصوصي تحصيلي موسسو له خوا په جدي توګه تطبيق شي.
نوموړي زیاته کړه، د لوړو زده کړو وزارت چمتو دی چې په هېواد کې د ځوانانو لپاره د زده کړو لازمې اسانتیاوې برابرې کړي، ځکه د ده په وینا د هېواد د پرمختګ یوازینۍ لاره د لوستو او مسلکي کسانو په روزلو پورې اړه لري.
همدا راز په دې غونډه کې د لوړو زده کړو وزارت د تضمین کیفیت او اعتبار ورکولو ریاست سرپرست رئیس شاکر وحیدي وویل، چې د دې غونډې له جوړیدو یې موخه د هغو تحصیلي بنسټونو د ستونزو اورېدل و، چې تر اوسه په دې نه دي بریالي شوي، چې د لوړو زده کړو وزارت د اعتبار ورکولو پروسه کې شامل شي.
ښاغلي وحیدي دا هم وویل چې، دغو بنسټونو ته به یو کال وخت ورکړل شي چې د اعتبار ورکولو په بهیر کې د شاملېدو لپاره د لازمو معیارونو سره ځانونه چمتو کړي.
په دې غونډه کې د کابل او ولایتونو د تحصیلي بنسټونو استازو د پرتو ستونزو د یادولو په ترڅ کې ژمنه وکړه چې، له دې فرصت څخه به په ګټې اخېستنې سره خپلې تحصیلي ادارې د لوړو زده کړو وزارت معیارونو سره سم برابرې کړي.
د غونډې په پای کې د لوړو زده کړو وزارت د تضمین کیفیت او اعتبار ورکولو ریاست سرپرست رئیس شاکر وحیدي ټینګار وکړ، چې په دغه وزارت کې شته شرایطو او اسانتیاوو ته په کتو سره به د دولتي او خصوصي تحصیلي بنسټونو د ستونزو د هوارولو لپاره اقدام وشي.
