د مرکزي زون دولتي پوهنتونونو د تضمین کیفیت مسؤلینو لپاره د تضمین کیفیت او اعتبار ورکونې نوي چوکاټ د تشریح څلور ورځنۍ ورکشاپ په بریالۍ توګه پای ته ورسېد.
د ورکشاپ د پایناستې په مراسمو کې د لوړو زده کړو وزارت د محصلانو چارو سرپرست معین شیخ ظاهر خان خادم وویل: «د لوړو زده کړو وزارت رهبري په دې هڅه کې ده چې د اسلامي او ملي ارزښتونو په رڼا کې د هېواد د تحصیلي بنسټونو کیفیت لوړ او له نړیوالو معیارونو سره سم کړي.»
د محصلانو چارو سرپرست معین د یاد ورکشاپ له ګډونوالو وغوښتل چې د ټولنې پر وړاندې خپل مسؤلیت اداء کړي او په تحصیلي بنسټونو کې یې د تضمین کیفیت د معیارونو پر عملي کولو ټینګار وکړ.
همدارنګه د لوړو زده کړو وزارت د تضمین کیفیت او اعتبار ورکونې رئیس استاد شاکر وحیدي د یاد ورکشاپ له ګډونوالو مننه وکړه او ویې ویل: «موږ د دې ډول ورکشاپونو د لارښوونو پر عملي کولو سره د تحصیلي بنسټونو ټولې تخنیکي او مسلکي اړتیاوې پوره کولی شو.»
وروسته د پروان پوهنتون علمي مرستیال دوکتور عبدالحق حنیف د ورکشاپ د ګډونوالو په استازیتوب د لوړو زده کړو وزارت څخه د مننې تر څنګ، د دا ډول ګټورو پروګرامونو پر دوام ټینګار وکړ.
محفل د ورکشاپ ګډونوالو ته د تصدیق پاڼو په وېشلو او د خیر په دعاء سره پای ته ورسېد.
