د هېواد د تحصیلي بنسټونو د جیولوجي او کانونو، ځمک پوهنې او چاپېریال ساتنې پوهنځيو د تحصیلي نصاب د بیاکتنې او پراختیا لومړی پړاو کلسټر پای ته ورسېد.
د یاد کلسټر په پایناسته کې د لوړو زده کړو وزارت مالي او اداري معین مولوي حافظ محمد حامد حسیب وویل چې پر تحصیلي نصاب کار کول، جاریه صدقه ده او تر څو چې له جوړ شوي نصاب څخه ګټه اخیستل کېږي، ټولو استادانو او متخصصینو ته به یې ثواب رسیږي.
د لوړو زده کړو وزارت مالي او اداري معین پر واحد او معیاري تحصیلي نصاب د ټینګار تر څنګ، وویل چې د ځمکې هغه برخې سرشاره معدني زېرمې لري، چې اسلام ورته رسېدلی دی. نوموړي د افغانستان د معدني زېرمو او د هېواد د اقتصادي بډاینې په برخه کې د هغو پر ارزښت خبرې وکړې او په اوسنیو شرایطو کې یې د کانونو کيندنه مهمه اړتیا وبلله.
همدارنګه د لوړو زده کړو وزارت مالي او اداري معین مولوي حافظ محمد حامد حسیب د تحصیلي بنسټونو استادانو او اړوندو ادارو مختصصینو ته د شته ستونزو د حل او په ټولو تحصیلي بنسټونو کې د دوی له لوري جوړ شوي نصاب د تدریس کولو ډاډ ورکړ.
همدا راز د لوړو زده کړو وزارت د تحصیلي نصاب رئیس مفتي عبدالرؤف فراهي د یاد ۵ ورځني کلسټر په اړه د معلومات تر څنګ، د کلسټر ګډونوالو له صادقانه کار څخه مننه وکړه.
وروسته د هرې پوهنځی استازي د خپل ۵ ورځني کار پایله، خپلې ستونزې او وړاندیزونه وړاندې کړل.
نېټه: پنج شنبه
۱۴۴۴/۵/۱۴هـ.ق ۱۴۰۱/۹/۱۷.ش ۲۰۲۲/۱۲/۸م
د لوړو زده کړو وزارت مطبوعاتي دفتر
