د هېواد د تحصیلي بنسټونو د ژبو او ادبیاتو پوهنځیو د تحصیلي نصاب د بیاکتنې او پراختیا لومړی پړاو کلسټر په بریالۍ توګه پای ته ورسېد.
د یاد کلسټر په پایناسته کې د لوړو زده کړو سرپرست وزیر شیخ الحدیث مولوي نداء محمد ندیم صاحب وویل، چې الله تعالی ټول رسولان له کتابونو سره رالېږلي، چې د نصاب حیثیت لري. نوموړي زیاته کړه چې پخوا به هر پوهنتون او مدرسې ځانګړی نصاب درلود، چې د هېواد په تحصیلي نظام کې یې ګډوډي رامنځته کړې وه او اوس موږ په دې هڅه کې یو چې واحد نصاب رامنځته کړو.
همدارنګه د لوړو زده کړو سرپرست وزیر د استادانو استعداد یو ستر امانت وباله او په یاد کلسټر کې یې د هغوی کار وستایه.
دغه راز د لوړو زده کړو وزارت د تحصیلي نصاب رئیس مفتي عبدالرؤف فراهي د ژبو او دبیاتو کلسټر له ټولو ګډونوالو د مننې تر څنګ، د هغوی کار او هڅې وستایلې.
وروسته د ژبو او ادبیاتو کلسټرونو استازو د خپل پنځه ورځني کار پایلې او وړاندیزونه وړاندې کړل او په ټولو تحصیلي بنسټونو کې یې پر واحد نصاب ټینګار وکړ.
د یادولو وړ ده چې د دغه کلسټر لپاره د هېواد تحصیلي بنسټونو سربېره د مختلفو ادارو متخصصین رابلل شوي وو، چې د ۵ ورځو پر جریان کې یې د ۱۳ څانګو پر تحصیلي نصاب کار وکړ.
نېټه: پنجشنبه
۱۴۴۴/۶/۱۲هـ.ق ۱۴۰۱/۱۰/۱۵هـ.ش ۲۰۲۳/۱/۵م
