د هېواد د پوهنتونونو او لوړو زده کړو مؤسسو د ښوونې او روزنې برخې د اختصاصي او مسلکي تعلیماتو، ارواپوهنې، تربیتي علومو او ارواپوهنې څانګو د بیاکتنې او پراختیا لومړی پړاو کلسټر پیل شو.
د یاد کلسټر په پرانیستې مراسمو کې د لوړو زده کړو وزارت علمي معین دوکتور لطف الله خیرخواه وویل چې موږ باید محصلین له خپل دین، کلتور، ژبې او خاورې سره په تړلې مفکوره وروزو او داسې نصاب ورته جوړ کړو چې د تخصص تر څنګ، دیني او ملي ارزښتونه پکې په پام کې نیول شوي وي.
د لوړو زده کړو وزارت علمي معین وویل چې زموږ په ټولنه کې علم ته د منصب او پیسو ګټلو په سترګه کتل کېږي، نوموړي د یاد کلسټر ګډونوالو استادانو څخه وغوښتل چې دا ذهنیت له منځه یوسي او موږ باید د علم واقعي مانا ته وروګرځو.
همدارنګه د لوړو زده کړو وزارت د تحصیلي نصاب رئیس مفتي عبدالرؤف فراهي د یاد کلسټر په اړه معلومات ورکړل او ویې ویل چې په دغه کلسټر کې به د ۱۵ څانګو پر نصاب کار وشي. هغه په نصاب کې د ملي ژبو د اصطلاحاتو پر ځای پر ځای کولو ټینګار وکړ او په دغه کلسټر کې شاملې څانګې یې د ټولنې لپاره مهمې وبللې.
وروسته د تحصیلي نصاب د ملي کمیسیون غړي پوهاند عبدالحمید لیان د کلسټر د کار بڼې په اړه پرېزنټېشن وړاندې کړ او له استادانو یې وغوښتل چې د کلسټر چارې د ټاکلو شویو مفرداتو سره سمې پر مخ یوسي.
