د کابل ښار او ولسوالیو د لېسو فارغانو د کانکور ازموینو لومړی پړاو نن د لوړو زده کړو وزیر په شتون کې پیل شو
په هغه خبري ناسته کې چې په دې اړه په کابل پوهنتون کې جوړه شوه، د لوړو زده کړو وزیر ډاکټر عباس بصیر په داسې حال کې چې د ملي ازموینې ادارې مشرتابه پلاوي، د کابل پوهنتون رییس او ازمویونکو استادانو شتون درلود، د روڼتیا او مثبت بدلونونو په اړه وینا وکړه چې د تېرو څو کلونو په لړ کې د کانکور په ازموینه کې رامنځته شوي دي.
هغه وویل:"د کانکور ازموینو سیسټم داسې ترتیب شوی چې د انساني مداخلې امکانات صفر شوی او یوازې د غوښتونکي وړتیا او چمتووالی په دې ازموینه کې د بریا معیار دی."
د لوړو زده کړو وزیر د دې ترڅنګ چې د ۱۴۰۰ کال غوښتونکو ته د بریا هیله وکړه وویل چې د کانکور ازموینه کې د کابل حوزې د ۵۸ زره او ۳۲۶ کسانو څخه ۲۵ زره او ۳۴۷ یې نجونې دي چې په اوسني وضعیت کې د پام وړ شمېر دی.
همدارنګه د لوړو زده کړو وزیر ډاکټر عباس بصیر د هېواد د تحصیلي بنسټونو د حضوري درسونو د پیل په اړه وینا وکړه او ویې ویل چې د عامې روغتیا وزارت د روغتیایي لارښوونو او د لوړو زده کړو وزارت چمتووالي سره سم؛ ټاکل شوې چې د زمري په ۱۶مه د شنبې په ورځ په هغو ولایتونو کې چې د کرونا ویروس پېښو د شمېر کچه د ۳۵ سلنې څخه ښکته وي او واکسین یې هم تطبیق کړی وي، حضوري درسونه پیل شي.
هغه زیاته کړه چې د لوړو زده کړو وزارت د عامې روغتیا وزارت سره له نږدې په اریکه کې دی، که چېرې د ۱۱ ولایتونو سربېره په نورو هغو ولایتونو کې چې د ناروغانو سلنه یې ۳۵ سلنې څخه ښکته وي او د واکسیناسیونو پروسه په هغو بنسټونو کې پلي شوي وي، حضوري درسونه به بیا پیل شي.
ورپسې د ملي ازموینو ادارې رییس پوهاند ډاکټر عبدالقدیر خموش د ۱۴۰۰ کال د کانکور د ازموینې د پروسې په اړه معلومات ورکړل او ویې ویل چې د کانکور ازموینې پروسه په درېیو پړاونو کې تنظیم شوې چې لومړی او دویم پړاو کې یې ۳۳ ولایتونه او درېیم د کابل حوزې د کانکور ازموینو پړاو دی.
هغه زیاته کړه چې د لومړي او دویم پړاو په بریالیتوب سره پای ته رسېدو وروسته، درېیم پړاو چې د کابل حوزې پورې اړوند ده، چې په هېواد کې د کرونا ویروس د خپرېدو له امله ځنډول شوی وو، چې له نېکه مرغه نن مو وکولی شو چې د کابل حوزې د کانکور ازموینه پیل کړو چې په څلور پړاونو کې تنظیم شوې وه.
د هغه په وینا د افغانستان د ۱۴۰۰ کال د کانکور ازموینې پایلې به په کابل کې د دوو نورو دورو وروسته چې سبا اخیستل کېږي، په راتلونکو لسو ورځو کې اعلان شي.
په دغه خبري کنفرانس کې د کابل پوهنتون رئیس پوهاند ډاکټر محمد عثمان بابري هم وینا وکړه او یادو شویو غوښتونکو ته د بریا هیله وکړه او ویې ویل چې نن ستاسو هڅې او زحمتونه به ستاسو راتلونکې بریاوې تضمین کړي.
هغه وویل چې په تېرو دوه لسیزو کې کلکې ستنې په تېره بیا د هېواد لوړو زده کړو په برخه کې اېښودل شوي چې موږ ښه راتلونکي ته هیلمنوي.
د ملي ازموینو د ادارې د معلوماتو پر بڼسټ د هېواد د ۱۴۰۰ کال د دیني علومو او شپې پوهنځیو عمومي کانکور ازموینه کې ټولټال ۲۱۴ زرو او ۹۸۱ کسانو ګډون کړی وو چې ۱۳۳ زره او ۱۸۴ کسان یې نرینه او ۸۱ زره او ۷۹۷ یې ښځینه دي.
