د کمال خان بند د پرانیستې په ویاړ ننګرهار پوهنتون کې علمي سیمینارونه جوړ شوه
په پام کې ده چې د کمال خان بند د پرانیستې په ویاړ ننګرهار پوهنتون کې علمي سیمینارونه، مناظرې، د مقالو لیکلو سیالۍ او نور پروګرامونه جوړ شي.
(زمونږ اوبه زمونږ ابرو ده) تر سرلیک لاندې یاد پروګرامونه به د پوهنتون د تدریسي بهیر له پیل سره سم په بېلابېلو پوهنځیو کې جوړ شي.
په همدې موخه د ننګرهار پوهنتون د رییس په مشرۍ مشورتي غونډه جوړه شوې وه، چې د علمي چارو او محصلانو چارو مرستیالانو، د کرنې، انجنیرۍ، اقتصاد او شرعیاتو پوهنځیو رییسانو، استادانو، د فرهنګي کمېټې مشر او ځینو اداري آمرینو په کې برخه لرله.
د پرانیستې وینا پر مهال د ننګرهار پوهنتون رییس پوهاند دوکتور خلیل احمد بهسودوال وویل: "د لوړو زده کړو وزارت له لارښوونې سره سم د کمال خان بند د پرانیستې په ویاړ د هېواد د اوبو سرچینو مدیریت او مهارولو د ارزښت په اړه به په ننګرهار پوهنتون کې علمي سیمینارونه، مناظري، د مقالو لیکلو او لوبو سیالۍ او د عامه پوهاوي نور پروګرامونه ترسره شي."
نوموړي د غونډې برخوالو ته سپارښتنه وکړه، چې د پوهنتون درسي بهیر دې د (زمونږ اوبه زمونږ ابرو ده) او (اوبه د افغانستان پانګه ده) په شعار سره پیل کړي.
د پوهنتون رییس د اړوندو پوهنځیو د مسوولینو او استادانو یوه لس کسیزه کمېټه وټاکله، چې د یادو چارو د ښه ترسراوي په موخه اړین چمتووالی ونیسي او راپور یې د پوهنتون د مشرتابه سره شریک کړي.
