د کمپیوټر د شبکو د نظارت او امنیت په اړه روزنیز ورکشاپ د لوړوزده کړو په وزارت کې جوړشو
لوړو زده کړو وزارت کې د ۲۲ دولتي پوهنتونو تخنيکي مسوولينو لپاره په پوهنتونو کې د کمپیوټري شبکو د څارنې او امنیت زده کړه ییز ورکشاپ تر سره شو.
د دې ورکشاپ ګډون کوونکي به د پنځو ورځو په ترڅ کې د اړوندو پوهنتونو د انټرنیتي شبکو د مصئونولو او پراختیا په برخه کې زده کړه وویني.
د لوړو زده کړو مالي او اداري مرستیال دوکتور احمد سیر مهجور د معلوماتې ټيکنالوژۍ ریاست ددې اقدام څخه د مننې وړاندې کولو په ترڅ کې په پوهنتونو کې د آی ټې د تخنیکي کارمندانو د وړتياوو لوړول یو اړین امر وبلل په پوهنتونو کې د معلوماتي ټيکنالوژي رول او د لوړو زده کړو د کیفیت په لوړولو کې د یادې ټيکنالوژي اثر کولو ته په اشارې سره د دې ورکشاپ له پر مخ وړونکو څخه وغوښتل چې کوم څه چې په دې ورکشاپ کې زده کوي په عمل کې پلي کړي، د خپلو تحصیلي بنسټونو د انټرنټي سيسټمونو مصئونیت او اعتبار لوړ کړي.
همدا ډول د لوړو زده کړو وزارت د معلوماتې ټيکنالوژۍ رئیسې پوهنملې شکريه جمال په پوهنتونو کې د معلوماتي ټيکنالوژۍ په ډګر کې د پرمختګونو په تړاو خبرې وکړې ویې ویل چې د معلوماتي ټيکنالوژۍ پیاوړتیا ته توجه کول او له ټيکنالوژۍ څخه د ګټې اخیستنې د لا ښو فرصتونو برابرول ددې لامل ګرځي چې د څیړنو، نوښتګرۍ، علم را مینځته کولو او په تحصيلي بنسټونو کې د نورو اکاډیميکو خدمتونو مثبتې آسانتياوې او بدلونونه را مینځته شي.
هغې په پوهنتونو کې د معلوماتي ټيکنالوژۍ د تخنيکي مسوولينو روزنه د یادو بنسټونو د کمپيوټري شبکو د لا ښه مدیریت او تنظیم په موخه اړین وبلل د ورکشاپ له ګډون کوونکو څخه یې وغوښتل چې د ورکشاپ له زده کړه ییزو برنامو څخه لویه ګټه پورته کړي.
د يادولو وړ دی چې د ورکشاپ ګډون کوونکي له لازمو زده کړو او خپلو اړوندو تحصیلي بنسټونو ته له بیرته تللو وروسته مکلف دي چې ټول هغه څه یې چې د انټرنیټ د امنیت، تنظیم او مدیریت په برخو کې زده کړي خپلو نورو کارمندانو ته د کورسونو د جوړولو له لارې ولیږدوي.
