د کمپیوټر ساینس ماسټرۍ او د ښوونې او رزونې د کمپیوټر ساینس څانګې برنامو د تحصیلي نصابونو د بیا کتنې او پراختیا لومړی پړاو کلستر پیل شو.
د پورتنیو برخو د کلستر د پرانیستې په مراسمو کې چې د لوړو زده کړو وزارت سرپرست شیخ الحدیث مولوي ندا محمد ندیم صاحب هم ګډون کړی و، ویناوالو د معلوماتي ټکنالوژۍ پر ارزښت او له هغې څخه د ښې استفادې په اړه خبرې وکړې.
د لوړو زده کړو وزارت علمي معین دوکتور لطف الله خیرخواه په اوسني عصر کې د معلوماتي ټکنالوژۍ د ګټو او ستونزو په اړه خبرې وکړې. هغه وويل چې په تېرو څو کلونو کې معلوماتي ټکنالوژۍ ډېر پرمختګ کړى او په دې برخه کې د مصنوعي ذکاوت يادونه کولى شو.
هغه د علم او انسان ترمنځ د اړیکو، د علم په اړه د اسلامي ټولنو رسالت، د علم او تربیې تر منځ اړیکو او د ټکنالوژۍ څخه د سالمې کارونې په اړه هم خبرې وکړې.
علمي معین وویل: «د مسلمانانو په حیث زموږ دنده دا ده چې د علم او انسان ترمنځ اړیکه ټینګه وساتو ترڅو علم په طبیعي بڼه د انسان د غوره زده کړې په لار کې خپل رول ولوبوي.»
نوموړي د خپلو خبرو په دوام کې د نصاب په برنامې کې له شاملو استادانو وغوښتل چې په اوسني عصر کې خپلو محصلانو ته د اخلاقي او انساني ارزښتونو تر څنګ له ټکنالوژۍ څخه په اغېزمنه توګه ګټه پورته کولو او د ښه نصاب د چمتو کولو لپاره هڅې وکړي.
ورپسې د لوړو زده کړو وزارت د نصاب رئیس مفتي عبدالروف فراهي د دې کلستر پر ارزښت او موخو خبرې وکړې او ویې ویل، چې په دې کلستر کې د کمپیوټر زده کړې د اساسي مضمونونو تر څنګ په نورو هغو مضمونونو چې د محصلانو د سالمې تربیې، فکري او عقیدوي روزنې لپاره اړین دي هم کار کیږي.
په دې مراسمو کې د ملي تحصيلي کميسيون غړي پروفيسور عبدالحميد ليان، د دې کلستر د میتود په اړه چې لیسانس او فوق لیسانس برنامې پکې شاملې دي، هر اړخيز معلومات وړاندې کړل او د ګډونوالو پوښتنو ته يې ځوابونه وويل.
