شیخ زاید پوهنتون کې د پایلو پر بنسټ مېتودونو (OBE/SCL) په تړاو ورکشاپ جوړ شو

د شیخ زاید پوهنتون مسلکي پراختیا مرکز (Professional Development Center) کې د پایلو پر بنسټ مېتودونو یا شاګرد محوره زده کړو ( Outcome Based Education/Student Center Learning- OBE/SCL)  په تړاو ۱۲ ورځنی ورکشاپ پیل شو.

 د ورکشاپ په پیل کې د علمي چارو مرستیال پوهندوی شفیع ګل شفیقي د ورکشاپ د ارزښت په اړه خپل نظریات ګډونوالو ته واورول او ټینګار یې وکړ چې د موضوع مهم والي ته په کتو؛ باید هر ګډونوال په ذهني او فزیکي ډول په ټولګي کې حاضر وي.

 د پوهنتون مالي او اداري چارو مرستیال فیض الله فیض د ورته ورکشاپونو په جوړېدو خوښي وښوده او ډاډ یې څرګند کړ چې د هغو پروګرامونو چې د استاد او شاګرد د علمیت بډایه کېدو سبب ګرځي، تل مالي او اداري ملاتړ کوي.

په پوهنتون کې د Higher Education Development   Program (HEDP) مسوول الهام حیدروال زیاته کړه چې دا ورکشاپ به د لوړو زده کړو وزارت د پراخیتایي پروګرام په همکارۍ ۱۲ ورځې دوام ولري چې دوه ورځې یې د E-Learning  او Belended Learning ته ځانګړې شوې دي.

 په ‌دې ورکشاپ کې هغه ۲۵ استادان ګډون لري چې د تر دې دمه یې په OBE/SCL کې برخه نه وه اخیستې.