لغمان پوهنتون د لومړي او دویم پړاو اکاډمیک اعتبار ترلاسه کړ
د لغمان پوهنتون مشرتابه، استادانو او کارکوونکو د پرله پسې او نه ستړي کېدونکو فعالیتونو په تر سره کولو سره وکولای شول چې د تضمین کیفیت او اعتبار ورکولو پروسې معیارونه بشپړ او یاد پوهنتون د هېواد د اکاډمیک اعتبار لرونکو پوهنتونونو په کتار کې ودروي.
دغه لاسته راوړنه د لغمان پوهنتون لپاره د لوړو زده کړو وزارت د تضمین کیفیت ریاست د ټاکل شوي پلاوي له هر اړخیزو ارزونو او کتنو وروسته په ډېر غور سره ترلاسه شوې ده.
د لغمان پوهنتون رئیس پوهنمل دوکتور عصمت الله دراني وویل:" له دې وروسته به لغمان پوهنتون په اکاډمیکو برخو کې خورا د پام وړ خدمات وړاندې کوي او د لوړو زده کړو محترم وزارت له خوا به د یو اکاډمیک اعتبار لرونکي پوهنتون په توګه پېژندل کېږي."
د یادونې وړ ده، چې په دې برخه کې د پوهنتون، علمي، کلتوري، اداري او ساختماني لاسته رواړنې ټولې د پام وړ اغېز لري او له همدې هر اړخیزې ارزونې وروسته دغه مقام ترلاسه شوی دی.
