له دولتي او خصوصي پوهنتونونو سره د زدکړیالانو د چارو معینیت د همغږۍ غونډه جوړه شوه
د زدکړیالانو د چارو معینیت د همغږۍ غونډه د بدخشان او تخار ولایتونو د دولتې او خصوصي پوهنتونونو سره په جلا ډول له مجازی لارې ترسره شوه.
د لوړو زده کړو وزارت د زدکړیالانو چارو مرستیال پوهندوی سید فرهاد شهیدزاده په داسې حال کې چې د دولتي زدکړیالانو رئیس پوهنوال محمد شریف امین، د خصوصي زدکړیالانو رئیس ډاکټر خیبرسیفي، د اکاډمیکو چارو د څارنې او ارزونې رئیس محمد ولي حنیف هم شتون درلود، د بدخشان او تخار ولایتونو په ۶ پوهنتونونو کې د تحصیلي خدمتونو د وړاندې کولو د څرنګوالي په اړه راپور واورېد او د یادو بڼسټونو مسؤلینو ته یې لارښوونه وکړه چې د علمي تجربو د شریکولو له لارې زدکړیالانو لپاره اسانتیاوې برابرې او مطلوبې تحصیلي لارې هوارې کړي.
د لوړو زده کړو وزارت د زدکړیالانو چارو مرستیال د دولتي او خصوصي بڼسټونو سره د همغږۍ غونډو ترسره کولو موخه په اوسني وضعیت کې د زدکړیالانو د خدمتونو د انسجام لپاره د ننګونو له منځه وړل او د فرصتونو او د وړ حل لارو چمتو کول وبلل او د تحصیلي وضعیت او د زدکړیالانو د خدمتونو وړاندې کولو پروسې د ښه والي لپاره یې د یادو ناستو پر دوام ټینګار وکړ.
د لوړو زده کړو وزارت د زدکړیالانو چارو مرستیال پوهندوی سید فرهاد شهیدزاده د تخار او بدخشان د دولتي او خصوصي پوهنتونونو له ټولو مسولینو وغوښتل چې د زده کړې د سیستم او زدکړیالانو خدمتونو د انسجام په برخه کې خپل راپورونه، ننګونې او فرصتونه د لوړو زده کړو وزارت د دولتي او خصوصي زدکړیالانو چارو ریاستونو ته واستوي تر څو په دې برخه کې لازم تصمیمونه ونیول شي.
