مالي او اداري معین نور احمد دروېش په کابل پوهنتون کې د برېښنایي پېژندپاڼو وېشلو ټیم وستایه
د لوړو زده کړو وزارت مالي او اداري معین په کابل پوهنتون کې د برېښنایي پېژندپاڼو د وېشلو ټیم وستایه او د پېژندپاڼو وېشلو او خلکو د ښو اسانتیاوو رامنځته کولو په برخه کې یې د هغوی مدیریت ګټور وباله. نوراحمد دروېش په کابل پوهنتون کې د ۱۲کسیز ټيم هڅې او د لوړو زده کړو وزارت کارکوونکو او د څلورو مرکزي پوهنتونونو استادانو او زدکړیالانو ته د پېژندپاڼو د وېشلو چټګه پروسه د ستایلو وبلله. د لوړو زده کړو وزارت مالي او اداري معین وویل چې برېښنایي پېژندپاڼه نه یوازې دا چې د اسنادو د پېژندنې په برخه کې د اسانتیا لامل ګرځي، بلکې په هېواد کې روڼتیا، پرمختګ او امنیت لامل هم ګرځي. په کابل پوهنتون کې د برېښنایي پېژندپاڼو د وېش مسوول اسدالله ستانکزي په دغه برخه کې د لوړو زده کړو وزارت له همکارۍ څخه مننه وکړه او ویې ویل، چې مراجعین یې ورځ تر بلې زیاتېږي. دغه راز زیاته یې کړه، چې ډېری مراجعین یې استادان او د لوړو زده کړو وزارت کارکوونکي دي، چې له خپلو کورنیو سره یو ځای د برېښنایي پېژندپاڼې تر لاسه کولو لپاره ورځي. هغه ټینګار وکړ چې دی او همکاران یې هڅه کوي چې له خپلو هېوادوالو او مراجعینو سره سم چلند وکړي او ژر یې کارونه ورته بشپړ کړي.
