ننګرهار پوهنتون کې د HEMIS سیستم دوه ورځنی روزنیز ورکشاپ پیل شو

یاد ورکشاپ د لوړو زده کړو وزارت د محصلانو چارو ریاست په نوښت د دغه پوهنتون د محصلانو د خدمتونو انسجام آمریت کې جوړ شوی، چې د ننګرهار پوهنتون سربېره د کونړ، لغمان او نورستان پوهنتونونو تدریسي او اجرائیه مدیرانو ته به پکې د یاد سیستم د کارولو په اړه روزنه او پوهاوی ورکړل شي.

د ورکشاپ د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د لوړو زده کړو وزارت د معلوماتي سیستم HEMIS د ارزښت او ښېګڼو په اړه وینا وکړه.

نوموړي وویل:" په ننګرهار پوهنتون کې د HEMIS سیستم څخه له وړاندې ګټه اخیستل کېده، چې د دې روزنیز پروګرام په تطبیق سره به دا بهیر نور هم پیاوړی شي."

پوهاند بهسودوال د پوهنتون د اړوندو څانګو مسؤلینو ته سپارښتنه وکړه، چې د لوړو زده کړو محترم وزارت د هدایت او د پوهنتون ادارې له پرېکړې سره سم باید د محصلینو، استادانو، کریکولم او د پوهنتون د اړوندو نورو برخو ټول توکي په سافټ بڼه د HEMIS په انلاین سیستم کې ځای پر ځای کړي.