ټاکل شوې ده، ډېر ژر به په اسټراليا او امريکا کې د مېشتو متخصصو افغانانو په مرسته د يوولسو دولتي تحصيلي بنسټونو د محصلينو د پوهې د کچې لوړاوي په اړه علمي تجربې شريکې شي.
په هغه غونډه کې چې په همدې موخه د ویډیو کنفرانس له لارې تنظیم شوې وه؛ د لوړو زده کړو وزارت علمي معین، د علمي پروګرامونو د پراختیا او معلوماتي تکنالوژي رییسانو، د علمي معينيت سلاکار او همداراز په پروګرام کې د شاملو پوهنتونونو مسوولينو او يادو متخصصينو پکې ګډون کړې و، د دې پروګرام پر څرنګوالي او د پلي کولو پر همغږۍ بحث او خبرې وشوې.
د لوړو زده کړو وزارت علمي معين پوهنمل عبدالتواب بالاکرزي د استادانو او په اسټراليا او امريکا کې د مېشتو متخصصينو د ستاينې تر څنګ وويل: «دغه پروګرام په يادو هېوادونو کې د مېشتو افغان متخصصينو له لوري چې کلونه يې هلته په بېلابېلو برخو کې په تدريس او څېړنه کې کار کړی، خپلې د کلونو تجربې او لاسته راوړنې به د هېواد له پوهنتونونو سره د سيمينارونو له لارې چې مخکې تر دې ټاکل شوي دي شريکې کړي. »
پوهنمل بالاکرزي څرګنده کړه، له نېکه مرغه چې موږ د نړۍ په بېلابېلو برخو کې لوړې وړتیا لرونکي متخصص هېوادوال لرو، که د يوه ميکانيزم له لارې د دوی له وړتیاوو څخه د محصلينو او ځوانانو د وړتیا لوړولو له پاره کار واخيستل شي، د هېواد د بشري سرچينو د پراختیا په برخه کې به ښې پايلې ولري.
نوموړي زياته کړه چې په لومړي ګام کې د هېواد ۱۱ لوی پوهنتونونه په دې پروګرام کې شاملېږي او په يوه مشخصه رشته کې پر يوه موضوع سيمينار ورکړل شي او په راتلونکي کې به نور تحصيلي بنسټونه هم پکې شاملېږي.
د لوړو زده کړو علمي معين په پروګرام کې له شاملو تحصيلي بنسټونو وغوښتل چې په مستقيمه توګه له هغو متخصصينو سره چې تحصيلي رشته، نوم او څانګه يې له دوی سره شريک شوي دي؛ په اړیکه کې شي او خپل پروګرامونه دې تنظيم کړي.
