ټاکل شوې د لوړو زده کړو وزارت له لورې په کابل ښوونې او روزنې پوهنتون کې «د افغانستان ښوونیزو او لوړو زده کړو بنسټنونو د پیاوړتیا ملي کنفرانس» تر سرلیک لاندې علمي کنفرانس جوړ شي.
په دې اړه خبرې کنفرانس کې چې نن د کابل د ښوونې او روزنې په پوهنتون کې جوړ شوی و، د دغه پوهنتون رئیس شیخ الحدیث سید بشیر اغا هاشمي د یاد کنفرانس د ترسره کېدو د موخو او ارزښت په اړه رسنیو ته معلومات ورکړل.
هغه وویل، د کابل ښوونې او روزنې پوهنتون د خپل ۶۰ کلن فعالیت په اوږدو کې سلګونه مسلکي کسان روزلي او د هېواد علمي او تحصیلي ټولنې لپاره یې وړاندې کړي، چې د هېواد د ښوونیزو او تحصیلي بنسټونو د پیاوړتیا په موخه راتلونکی کنفرانس هم ترسره کېږي.
هغه زیاته کړه: «په دغه کنفرانس کې چې ټاکل شوې د روانې اونۍ د چهارشنبې او پنجشنبې په ورځو کې ترسره شي، د هېواد د تحصیلي بنسټونو ټول استادان او څېړونکو رابلل شوي، چې د هېواد ښوونیزو او تحصيلي نظام د ښه والي، پیاوړتیا، ستونزو، ننګونو او حل لارو په اړه خپلې علمي مقالې وړاندې کړي.»
همدار راز يې وويل، چې اوس مهال د استادانو، څېړونکو او محصلينو لپاره د علمي، اکاډميک او تحصيلي فعاليتونو ترسره کولو ښه زمینه برابره شوې او څېړونکي کولای شي په ازاده توګه خپل فعاليتونه ترسره کړي.
د يادونې وړ ده چې د لوړو زده کړو وزارت د پلان له مخې په روان او راتلونکو کلونو کې دا ډول ملي او نړيوال کنفرانسونه د هېواد په ځېنو تحصيلي بنسټونو کې ترسره شي.
