د امیر د احکامو اطاعت، د امیر شخصیت او مقام ته درناوی او همدارنګه د خلکو او ادارې پر وړاندې د امیر مکلفیتونه د اسلام د دین له مهمو او اساسي موضوعاتو څخه دي.

دغه څرګندونې د لوړو زده کړو سرپرست وزیر شیخ الحدیث مولوي نداء محمد ندیم، د کابل طبي علومو پوهنتون مسؤلینو او منسوبینو سره په اصلاحي او لارښوونیزه ناسته کې وکړې.
د لوړو زده کړو سرپرست وزیر په پورتنیو موضوعاتو د ټینګار تر څنګ وویل چې د یوه نظام تحکیم او اداري چارو ښه والي په موخه اطاعت، همغږي، په صادقانه او مخلصانه ډول کار ډېر اړین دی.
هغه دغه راز وویل چې امیر د خلکو او د هغه د ماتحتو پر وړاندې یو لړ مکلفیتونه لري، چې په دې برخه کې د مشورتي او نظریاتي ناستو دایرول، راپور ورکول او راپور اخیستل او نور هغه مسایل پکې شامل دي چې د ادارې فعالیتونه ښه او چټک کوي.
ورپسې د کابل د طبي علومو پوهنتون مسؤلینو او منسوبینو د کاري چارو د ښه والي او چټکتیا په برخه کې د لوړو زده کړو سرپرست وزیر له اصلاحي خبرو څخه مننه وکړه او د خپلو فعالیتونو، لاسته راوړنو او ستونزو په اړه یې د لوړو زده کړو وزارت سرپرست وزیر ته معلومات ورکړل.
نېټه: سه شنبه
۱۴۴۶ هـ ق د صفرالمظفر ۱۶ مه
۱۴۰۳ هـ ش د اسد ۳۰ مه
۲۰۲۴ م د اګست ۲۰ مه