د لوړو زده کړو سرپرست وزیر لوګر لوړو زده کړو مؤسسه کې د ٦٦ میلیونه افغانیو په ارزښت اته بېلا بېلې پروژې پرانیستې
په یادو پروژو کې د دغې مؤسسې د احاطوي دېوال او عمومي دروازې د پاتې برخو رغونه، څلور حلقې ژورې د اوبو څاه ګانې، یو باب معیاري کانټین، یو باب سایبان، له عمومي برېښنا شبکې سره د دغې مؤسسې برېښنا نښلول، نوري فایبر او همدا راز شبکه سازي پروژې شاملې دي، چې د ټولو ارزښت شاوخوا (۶۶میلیونه) افغانیو ته رسیږي.
د یادو پروژو د پرانیستې پر مهال د لوړو زده کړو سرپرست وزیر محترم شیخ الحدیث مولوي نداء محمد ندیم خوښي وښوده او د هېواد د تحصیلي مرکزونو هر اړخیز پرمختګ او ودانول یې د نظام لومړیتوبونه یاد کړل.
همدارنګه د لوګر لوړو زده کړو مؤسسې رهبرۍ د لوړو زده کړو د سرپرست وزیر له ورتګ څخه خوښي وښوده او د یادو پروژو په بشپړولو کې یې د هغه له همکارۍ څخه مننه وکړه.
د دې تر څنګ د لوړو زده کړو سرپرست وزیر د دغې مؤسسې په علمی شورا کې هم برخه واخیسته او د یاد تحصیلي نهاد د چارو تر ارزونو وروسته یې، مشرتابه پلاوي او استادانو ته لازمې سپارښتنې وکړې.
