د لوړو زده کړو وزیر د سرحدونو او قبایلو له وزیر سره وکتل
د لوړو زده کړو وزیر دوکتور عباس بصیر د سرحدونو او قبایلو له وزیر محب الله صمیم سره په خپل کاري دفتر کې وکتل.
په دغه لیدنه کې دواړو اړخونو په سرحدي ولایتونو کې د زده کړو پر قوي کېدو او لوړو زده کړو ته د سرحدي ولایتونو ځوانانو پر لاسرسي خبرې وکړې.
د لوړو زده کړو وزیر دوکتور عباس د دغه وزارت پروګرامونو او لومړیتوبونو په اړه معلومات ورکړل او ویې ویل چې لوړو زده کړو وزارت لوړو زده کړو ته د متوازن لاسرسي په پام کې نیولو سره د هېواد په ګوټ ګوټ کې د خدمتونو وړاندې کولو او همدارنګه د هېواد ټولو ځوانانو ته د زده کړې برابرولو لار هواروي.
همدارنګه د سرحدونو او قبایلو وزیر محب الله صمیم د لوړو زده کړو وزارت وروستي پروګرامونه وستایل او په سرحدي ولایتونو کې یې د هر ډول تحصیلي پروګرامونو د پلي کولو په برخه کې د همکارۍ ټټر وډباوه.
