د افغانستان امریکایي پوهنتون له مسوولانو سره د لوړو زده کړو وزیر ویډیو کنفرانس
د لوړو زده کړو وزیر د ویډیو کنفرانس له لارې د افغانستان امریکايي پوهنتون له مسؤلینو سره د قرنطین په ورځو کې د تدریس او الکټرونیکي زده کړې د پروسې د ښه والي او نورو اکاډمیکو مسایلو په اړه خبرې وکړې.
په دې لیدنه کې په داسې حال کې چې د لوړو زده کړو وزارت د علمي پروګرامونو د پراختیا رئیس او د وزیر سلاکار ګډون درلود، د لوړو زده کړو وزیر ډاکټر عباس بصیر وویل چې د افغانستان امریکایي پوهنتون د هېواد یو له معتبرو پوهنتونونو څخه دی او توانېدلی چې د اعتبار ورکولو سند په ترلاسه کولو سره په هېواد کې د لوړو زده کړو په برخه کې ښه خدمتونه وړاندې کړي.
د لوړو زده کړو وزیر د کرونا ویروس خپرېدو سختو شرایطو او د تحصیلي بڼسټوڼو د الزامي تعطیل ته په اشارې سره وویل چې په لنډمهال کې د بېلابېلو پلاټفارمونو په کارولو سره د الکترونیکي زده کړې او په راتلونکي کې د HELMS سیسټم بڼسټیز کول په هېواد کې د حضوري درسونو تر پیلېدو پورې د تدریس او الکترونیکي زده کړې د پروسې د رکود د مخنیوي لپاره غوره لاره یاده کړه او څرګنده یې کړه چې د هېواد د لوړو زده کړو بڼسټونو به په همغږۍ او ګډو هڅو سره شته ننګونې هوارې او د الکترونیکې زده کړې ښې اسانتیاوې برابرې کړي.
ورپسې د افغانستان د امریکايي پوهنتون رئیس بیک فورټ او د دغه پوهنتون علمي مرستیالې ویکتوریا فونتان د لوړو زده کړو وزارت له ملاتړ څخه مننه وکړه او ژمنه یې وکړه چې په افغانستان کې د ځوان نسل د خدمت او د علم او پوهې پرمختګ لپاره به لا ډېرې هڅې وکړي.
د یاد پوهنتون رئیس او علمي مرستیالې د لوړو زده کړو وزیر ته یو لړ وړاندیزونه او غوښتنې هم مطرح کړې چې د لوړو زده کړو وزیر او د علمي پروګرامونو د پراختیا رئیس لخوا ځواب شوی او د دوی ستونزو او غوښتنو ته د رسېدنې لپاره د دوامداره اړیکو پر ټینګښت د قوانینو او مقرراتو په رڼا کې ټینګار وشو.
