د لوړو زده کړو وزیر د مرکز څلورو پوهنتونونو له زده کړیالانو سره وکتل
د لوړو زده کړو وزیر شیخ عبدالباقي حقاني د مرکز څلورو پوهنتونونو له زده کړیالانو سره وکتل او هغوی ته یې د پوهې تر لاسه کولو او د دعوت په لاره کې د مبارزې سپارښتنه وکړه.
د لوړو زده کړو وزیر زده کړیالانو ته د اسلامي امارت د بریا مبارکي وویله او ټینګار یې وکړ، چې د ټولنې د اصلاح، روزنې او دعوت په برخه کې د زده کړیالانو مسوولیت، د جهاد له وخت څخه څو چنده زیات احساسیږي.
هغه زیاته کړه، چې اوسمهال لوړو زده کړو وزارت او مسوولان، د زده کړیالانو د فعالیت او دعوت تر شاه ولاړ دي او د زده کړیالانو لپاره د دعوت او کلتوري او ټولنیزو فعالیتونو لپاره میدان خلاص دی. نو دغه زده کړیالان باید خپل ټول ګټور نظرونه، په تدوین شوې بڼه، د یوه وړاندیز د ټولګې په توګه د لوړو زده کړو وزارت مشرتابه ته وسپاري، څو د دغو ځوان او بااستعداده کسانو له نظرونو په هغو پروګرامونو کې استفاده وشي، چې تر لاس لاندې دي.
په دغه ناسته کې یو شمېر زده کړیالانو د حاضرو او غایبو زده کړیالانو په استازیتوب خبرې وکړې او د زده کړو او پوهنتوني فعالبیتونو د ستونزو په اړه یې خپل وړاندیزونه وړاندې کړل، چې د لوړو زده کړو وزارت د مقام له لوري د همکارۍ جدي ژمنه ورسره وشوه.
