د لوړو زده کړو وزارت مالي او اداري معین مولوي حافظ محمد حامد حسیب د دغه وزارت د اطلاعاتو، نشراتو او عامه اړېکو ریاست له رئیس، امرینو او عمومي مدیرانو سره وکتل، د هغوی د کارونو او فعالیتونو راپور یې واورېد او د غوره خدماتو وړاندې کولو په اړه یې لازمې لارښو

سه شنبه، ۹ حمل ۱۴۰۱
د لوړو زده کړو وزارت مالي او اداري معین مولوي حافظ محمد حامد حسیب د دغه وزارت د اطلاعاتو، نشراتو او عامه اړېکو ریاست له رئیس، امرینو او عمومي مدیرانو سره وکتل، د هغوی د کارونو او فعالیتونو راپور یې واورېد او د غوره خدماتو وړاندې کولو په اړه یې لازمې لارښوونې ورته وکړې.

دغه لیدنه، چې د کلام الله په مبارکو اياتونو سره پيل شوه، لومړی د لوړو زده کړو وزارت مالي او اداري معین د نشراتي فعاليتونو د رول او اهميت په باب خبرې وکړې او د اسلامي او ملي ارزښتونو په نظر کې نیولو سره يې د حقايقو په ښه انعکاس ټينګار وکړ.

مولوي حافظ محمد حامد حسیب نشراتي فعالیتونه په اکاډمیک چاپیریال کې د خدمتونو د وړاندې کولو یوه مهمه او اساسي برخه وبلله او د نشراتو له کارکوونکو یې وغوښتل چې، په هېواد کې د لوړو زده کړو په برخه کې د فعاليتونو په اړه د عامه پوهاوي په برخه کې زياتې هڅې وکړي، تر څو افغان ملت او د نړۍ خلک د لوړو زده کړو د پیاوړتیا او پرمختګ او په دې برخه کې د شته پروګرامونو له لاسته راوړنو او فعالیتونو خبر شي.

د لوړو زده کړو وزارت مالي او اداري معین د مخالفينو منفي تبليغاتو ته په اشارې سره وويل، نشراتي برخې مکلفې دي، چې په خپل وخت سره واقعیتونه په ډاګه کړي او د خلکو د ذهنونو د روښانولو په برخه کې جدي هڅې وکړي.

دغه راز مالي او اداري معین خلکو ته د صادقانه خدمتونو د وړاندې کولو په برخه کې د اسلام د مبارک دین لارښوونو ته اشاره وکړه او د دغه وزارت د اطلاعاتو، نشراتو او عامه اړېکو له مسوولينو یې وغوښتل، چې خپلې ټولې نشراتي چارې د اسلام د سپيڅلي دين له لارښوونو او ارشاداتو سره سمې پرمخ بوځي.

ورپسې د لوړو زده کړو وزارت د اطلاعاتو، نشراتو او عامه اړېکو رئیس مدیر جان کوټوال د دغه ریاست د فعالیتونو، لاسته راوړنو، راتلونکو پلانونو، ستونزو او حل لارو په اړه معلومات ورکړل او د اطلاعاتو، نشراتو او عامه اړېکو ریاست په وروستیو لاسته راوړنو یې د رڼا اچولو ترڅنګ ژمنه وکړه، چې د لوړو زده کړو وزارت د رهبرۍ د لارښوونو او هدایاتو په رڼا کې به د خپلو مسوولیتونو او دندو په ترسره کولو کې به هېڅ راز هڅې ونه سپموي.
 د لوړو زده کړو وزارت مالي او اداري معین، د اطلاعاتو، نشراتو او عامه اړېکو رياست د فعاليتونو او لاسته راوړنو په اړه د راپور له اورېدو وروسته، د دغه رياست د کړنو د ستاينې ترڅنګ د لوړو زده کړو په برخه کې د نشراتي چارو د پياوړتيا لپاره د هر راز همکارۍ ژمنه وکړه.

غونډه د شهیدانو پاک روح، دایمي ثبات او په هېواد کې د لوړو زده کړو د ودې او پیاوړتیا برخو ته په دعا کولو سره پای ته ورسیده.

د يادونې وړ ده، چې تر دې وړاندې هم د لوړو زده کړو وزارت مالي او اداري معین د نورو رياستونو له يو شمېر مسوولينو او کارکوونکو سره کتلي وو.