د لوړو زده کړو سرپرست وزیر کونړـ ولایت ته د خپل رسمي سفر پر مهال په کونړ سید جمال الدین افغان پوهنتون کې د ۲۷ میلیونه افغانیو په لګښت دری پروژې پرانیستې.
یادې پروژې چې د کونړ ـ سید جمال الدین افغان پوهنتون د حفظ او مراقبت پروژې او یوه اداري ودانۍ، داخلي سړکونو ترمیمات او ۴۰پایې کمپیوټر لب پېرل پکې شامل دي، د لوړو زده کړو وزارت له بودیجې څخه تکمیل او د دغه وزارت سرپرست له لوري د پټۍ په پرې کولو سره ګټې اخیستنې ته وسپارل شوې.
همدارنګه د لوړو زده کړو سرپرست وزیر شیخ الحدیث مولوي نداء محمد ندیم صاحب یوې سترې ولسي غونډې ته، چې د کونړ ولایت مرستیال والي، امنیې قومندان، د جهادي مدرسې شیوخ کرامو، د کونړـ سید جمال الدین افغان پوهنتون مشرتابه پلاوي، استادانو، محصلینو، د نورستان لوړو زده کړو مؤسسې مشرتابه پلاوي او قومي مشرانو ګډون کړی و، وینا وکړه.
نوموړي په خپلو خبرو کې وویل چې د ا.ا.ا مشرتابه د هېواد تحصیلي ډګر د پرمختګ لپاره ډېرې هڅې کړي او تر نورو برخو یې ډېره بودیجه ورته ځانګړې کړې ده.
د لوړو زده کړو سرپرست وزیر د افغانستان خپلواکۍ ته په اشارې سره وویل: «هېڅ بهرني هېواد ته اجازه نه ورکوو چې د افغانستان په داخلي چارو کې مداخله وکړي، اوسمهال افغانستان واحد قیادت لري، د افغانستان خلک د ورورولۍ او یووالي په فضاء کې د یو بل تر څنګ ژوند کوي، ډلې او ګوندونه نشته، فساد، غلا او رشوت پکې ختم شوي دي او د چا مرستې او پور ته اړتیا نه لري.»
