د لوړو زده کړو سرپرست وزیر د خوست امام محمد بن حسن شیباني رحمه الله له دارالایتام څخه لیدنه وکړه.
د لوړو زده کړو سرپرست وزیر شیخ الحدیث مولوي نداء محمد ندیم خوست ولایت ته په خپل رسمي سفر کې، د امام محمد بن حسن شیباني رحمه الله د دارالیتام له مسؤلینو او یتیمانو سره په کتنه کې هغوی ته مهمې خبرې او سپارښتنې وکړې.
نوموړي په یاد دارالیتام کې وویل چې امیرالمؤمنین صاحب حفظه الله د افغانستان ټولو دارالیتامونو ته ځانګړې پاملرنه او توجه کړې او زیاته یې کړه چې د ا.ا.ا د یتیمانو پالنې او روزنې لپاره امکانات برابر کړي او په دې برخه کې لا هڅه کوي.
همدارنګه د لوړو زده کړو سرپرست وزیر د امام محمد بن حسن شیباني رحمه الله دارالیتام یتیمانو ته وویل چې ستاسو پلرونو په لوړ همت او ښه نیت د الله تعالی په لاره کې قربانۍ ورکړي دي، د زمانې له ستر فرعون سره وجنګېدل او الله تعالی ستاسو د پلرونو د قربانیو په وسیله د افغانستان ټول مسلمانان له ظلم څخه خلاص کړل.
هغه یتیمانو ته په خطاب کې وویل: «تاسو باید د خپل پلار نوم وساتئ، علم زده کړئ، خپل وخت مه ضایع کوئ، ځان کمال ته ورسوئ، د خپلې مور، مشر ورور، استاد او خپلوانو درناوی او خدمت به کوئ.»
دغه راز سرپرست وزیر د یاد دارالیتام مسؤلینو او استادانو دنده مهمه وبلله او زیاته یې کړه، چې تاسو ته دروند او مهم مسؤلیت در پر غاړه دی. نوموړي د یاد دارالیتام مسؤلینو او استادانو ته سپارښتنه وکړه چې په ډېر اخلاص د یتیمانو روزنه او پالنه وکړي.
نېټه: یکشنبه
۱۴۴۶هـ.ق، د ربیع الثاني ۱۷ مه
۱۴۰۳هـ.ش، د میزان ۲۹مه
۲۰۲۴م، د اکتوبر۲۰ مه
