د افغان اېکس (Afghan x) تر نوم لاندې د پرليکه کورسونو د زدکړو پلاټفارم پرانستل شو.
د افغان اېکس (Afghan x) تر نوم لاندې د پرليکه کورسونو د زدکړو پلاټفارم پرانستل شو.
دغه روزنیزپلاټفارم نن د دوست هېواد هندوستان د ممبيي د IIT پوهنتون له لارې د يوه ويډيويي کنفرانس په واسطه پرانيستل شو.
یاد روزنيز پلاټفارم چې په ملي ژبو د افغان محصلینو د زده کړه ییزو وړتیاوو د لوړولو په موخه طرح شوی دی، په پرانستلو به يې افغان محصلين له دغې طرحې څخه په استفاده وکولای شي په لومړيو کې د درسي مرستندوی په توګه او د اوږده مهال لپاره د تحصيلي بنسټونو په درسي کرېډېټونو کې د شامل مضمون په توګه ګټه واخلي.
یاد پلاټفارم د يوه هوکړه ليک له مخې چې د لوړو زده کړو وزارت او دوست هېواد هندوستان د بشري سرچينو د پراختيا وزارت (MHRD) تر منځ د علمي همکاريو، د ماسټرۍ د ګډو پروګرامونو د جوړولو، د علمي کادرونود روزنې، د دوکتورا بورسونو، د برېښنايي زده کړو د پياوړتيا، د ګډو سمپوزيمونو جوړولو او د وړتیا لوړولو پروګرامونو د پراختیا په موخه له وړاندې لاسليک شوی و، پرانستل شو،
د لوړو زده کړو وزارت د دې هوکړه ليک په پام کې نيولو سره د ممبيي د IIT پوهنتون (د سيمې په کچه په انجنيري او تخنيکي برخه کې يو نوموتی پوهنتون) په همکارۍ په دې پلاټفارم کې د زده کړو له پاره ۱۷ پرليکه کورسونه ثبت کړي او د استادانو او محصلينو په خدمت کې يې ورکړي دي.
د لوړو زده کړو وزارت علمي معين پوهنمل عبدالتواب بالاکرزي په دې ويډيو کنفرانس کې د افغان اېکس پرليکه کورسونو پيليزه، د هېواد د لوړو زده کړو وزارت د کورنۍ او هندوستاني دوستانو، په ځانګړي ډول پروفيسور فټک (Prof. Phatak)، ډاکټر کلېپنا او د دوی تخنيکي همکارانو ته يوه لويه لاسته راوړنه وبلله ،زياته يې کړه چې د زده کړو د پرانيستي پلاټفارم، اېدکس د افغان اېکس تر نوم لاندې يو ښه پيل و چې د هېواد د لوړو زده کړو د معياري کولو له پاره درې کلنې موخه ییزې اړتیاوې بلل کېږي.
د لوړو زده کړو مالي او اداري معين نوراحمد دروېش هم د افغان اېکس ارزښت ته په اشارې سره، د یاد پلاټفارم پيلول د هېواد د لوړو زده کړو په پرمختګ کې اغېزمن وبلل او د لوړو زده کړو وزارت او د ممبيي د IIT پوهنتون تر منځ يې د همکاريو پر دوام ټينګار وکړ.
په پای کې د ممبيي دIIT پوهنتون مسئولينو د دواړو هېوادونو تر منځ د اکاډميکو اړيکو پر ښه والي خبرې وکړې او د پوهې او علم په تګلوري کې يې د افغانستان د اکاډميکو او علمي بنسټونو د پياوړي کېدو له پاره د افغان اېکس پلاټفارم جوړول ارزښت لرونکي وبلل.####
