د لوړو زده کړو وزير د يو شمېر پوهنتونونو د مالي او اداري مرستيالانو سره وکتل
د مرکز او ولایاتو یوشمېر پوهنتونونو مالي او اداري مرستیالانو د لوړو زده کړو وزیر ډاکټر عباس بصیر سره خپلې طرحې، برنامې او ستونزې شریکې کړې. د لوړو زده کړو وزیر په دغه لیدنه کې د مالي او اداري مرستیالانو مسوولیت مهم وباله او ویې ویل؛ چې د لوړو زده کړو سکټور او پوهنتونونو ټول فعالیتونه په مالي او اداري برخې پورې تړلي دي.
نوموړي وویل په داسې حال کې چې د ټولو پوهنتونو د مالي معاونیتونو فعالیتونه سره ورته دي؛ نو باید خپلې اغېزمنې او ښې طرحې له یوبل سره شریکې کړي، د زېربناوو د پراختیا په برخه کې اړتیاوې په ګوته او په لومړیتوبونو کې ونیسي. د لوړو زده کړو وزیر مالي او اداري مرستیالانو ته سپارښتنه وکړه څو د رخصتیو په لړ کې د مالي چارو د نظم او دسپلین لپاره خپلې طرحې چمتو کړي څو د درسونو له پیل سره هرڅه له وړاندې په سمه توګه تنظیم وي.
په دغه لیدنه کې د کابل پولي تخنیک پوهنتون مالي او اداري مرستیال خواجه محمد انور نوري د ورسره پلاوي په استازولۍ؛ په پوهنتونونو کې د ستونزو، فرصتونو او مالي برخې پر مدیریت خبرې وکړې. خواجه نوري ددغې لیدنې موخه د لوړو زده کړو وزارت مشرتابه ته د پوهنتونو د مالي او اداري مرستیالانو ورپېژندنه، د طرحو وړاندې کول او په کاري چاپیریال کې د کار ښه کېدو په اړه یې د ښو مشورو ورکول وبلل.
نوموړي وویل چې د پوهنتونونو مالي او اداري مرستیالان د اداري اصلاحاتو او ملکي خدمتونو ادارې له لوري د ازادې سیالۍ له لارې ګمارل شوي او موخه یې د لوړو زده کړو وزارت د مشرتابه په ملاتړ؛ پوهنتونونو ته د ښو او صادقانه خدمتونو وړاندې کول دي.
ډاکټر عباس بصیر ټولو مالي او اداري مرستیالانو ته ډاډ ورکړ چې تل یې په خدمت کې دی او له هغو ټولو طرحو به یې؛ چې د مثبت بدلون لامل کېږي ملاتړ وکړي.
