د تحصیلي بنسټونو د طبي او لابراتواري تجهیزاتو د ځانګړنو د بیاکتنې ناسته وشوه
د هېواد مرکز او ولایتونو د تحصیلي بنسټونو د طبي او لابراتواري تجهیزاتو د ځانګړنو د بیاکتنې ناسته د لوړو زده کړو وزارت مالي او اداري معین نور احمد دروېش په مشرۍ تر سره شوه.
په دغه ناسته کې د لوړو زده کړو وزارت د تدارکاتو رییس عبدالله صوفي زاده او په انلاین بڼه د مرکز او ولایتونو یو شمېر مسوولانو هم ګډون کړی وو. ګډونوالو په تحصیلي بنسټونو کې له لابراتواري وسایلو د کار اخیستنې، ساتنې او همدارنګه د برېښنایي کتابتونونو په اړه ویناوې وکړې او نظرونه یې سره شریک کړل.
د لوړو زده کړو وزارت مالي او اداري معین نور احمد دروېش د دغه وزارت له لوري په اکاډمیک چاپېریال کې له لابراتواري دستګاوو د تخصصي ګټې اخیستنې د لارو چارو د ښودلو تر څنګ د هېواد په تحصیلي بنسټونو کې د الکترونیکي کتابتونونو جوړول له خپلو لومړیتوبونو وبلل او ویې ویل چې باید جدي کار پرې وشي.
په دغه ناسته کې د تحصیلي بنسټونو غړو ګډونوالو یاد ګام ته هیلهمندي وښوده او ټینګار یې وکړ چې د لابراتوارونو د ساتنې لپاره باید فني کارکوونکي استخدام شي او د دغو وسایلو ساتنه او مینځل په مسلکي بڼه تر سره شي. دغه راز د الکترونیکي کتابتونونو د جوړولو په اړه د ګډونوالو طرحه او وړاندیزونه واخیستل شول او د اغېزناک پلي کولو په اړه یې هراړخیز بحثونه وشول.
د لوړو زده کړو وزارت مالي او اداري معین نور احمد دروېش وویل چې د دغه کمېسیون د غړو له لوري د فني او مسلکي طرحو وړاندې کولو ته په پام سره د لوړو زده کړو وزارت تیار دی چې د لابراتوارونو معیاري کولو او ساتلو او همدارنګه الکترونیکي کتابتونونو د جوړولو طرحې ته په خپلو کاري لومړیتوبونو کې ځای ورکړي.
