د لوړو زده کړو د ښوونیز مدیریت نوي سیستم د پېژندنې او کارولو په موخه د کابل ښوونې او روزنې په پوهنتون کې د ۲۰ امارتي تحصیلي بنسټونو الکترونکي زده کړو بورد مسئولانو او سیستم کې شامل استادانو ته دوه ورځنی ورکشاپ جوړ شو.

د دې ورکشاپ د جوړیدو موخه د (HELMS) سیسټم د پلي کولو څرنګوالی، د برېښنايي زده کړو له بنسټیزو مفاهیمو سره اشنا کېدل، د سیسټم د کارولو څرنګوالی، د داخلي کورسونو جوړول او د تدریسي موادو ترتیبول ده.
د لوړو زده کړو وزارت علمي مرستیال دوکتور لطف الله خیرخواه د یاد ورکشاپ د پرانیستې په مراسمو کې د یادې موضوع په اړه د خبرو ترڅنګ د نوموړي سیستم د چمتو کولو په برخه کې د لوړو زده کړو وزارت له معلوماتي ټکنالوژۍ او د علمي برنامو پراختیا ریاستونونو او همدارنګه د علمي معینیت سلاکار څخه مننه وکړه.
هغه وویل: «د خوښۍ ځای دی چې د لوړو زده کړو وزارت تخیکي ټیم وکولای شول چې د څه باندې درې میلیونه افغانیو په لګښت دغه سیستم جوړ کړي چې په تېر کې د (HELMS) الکترونیکي ښوونیز سیستم د مدیریت لپاره ۵۰ میلیونه افغانۍ ځانګړې شوې وې له بده مرغه چې پایله یې نه لرله.»
همداراز علمي مرستیال وویل چې د لوړو زده کړو وزارت او په ټوله کې د افغانستان اسلامي امارت د هیواد د دیني او فرهنګي ارزښتونو په رڼا کې له شته فرصتونو څخه په سمه توګه ګټه پورته کوي او د افغانستان د ښوونې او روزنې د نظام د ښه والي لپاره هر ډول لګښتونو ته چمتو دی.
ښاغلي خیرخواه په ورکشاپ کې له ګډونوالو استادانو وغوښتل چې له یاد ورکشاپه ګټوره ګټه پورته کړي او د موضوعاتو د تطبیق په برخه کې په خپلو اړوندو تحصیلي بنسټونو کې ښوونیز پروګرامونه تنظیم کړي.
ورپسې د کابل د ښوونې او روزنې پوهنتون رئیس شیخ الحدیث سید بشیر اغا هاشمي دا ډول ورکشاپونه د هېواد د تحصیلي بنسټونو د استادانو د ظرفیت په لوړولو کې ګټور وبلل.
دغه راز د لوړو زده کړو وزارت د علمي معینیت سلاکار پوهاند غلام دستګير خاورين د برېښنايي مديريتي سيسټم HELMS)) په کارولو سره د انلاين کورسونو په اړه معلومات ورکړل او ويې ويل، چې د هېواد د سړو ولايتونو تحصیلي بنسټونو طاق سمستر په قوس میاشت کې پیلیږي، څلور اونۍ به حضوري وي، په جدي او دلو میاشتو کې اته اونۍ به انلاین وي او د حوت میاشتې څلور اونۍ به حضوري وي. د هغه په وینا د یاد سمستر ازموینې به په حمل میاشت کې واخیستل شي.
د مسوولینو په خبره، د لوړو زده کړو په یو شمېر نورو بنسټونو کې به هم ورته ورکشاپونه د محترمو استادانو لپاره جوړ شي.