د خصوصي لوړو زده کړو مؤسسو کمیسیون غونډه جوړه شوه
د خصوصي لوړو زده کړو مؤسسو کمیسیون غونډه د لوړو زده کړو سرپرست وزیر پوهنمل عبدالتواب بالاکرزي په مشرۍ جوړه شوه.
په دې غونډه کې د مالي او اداري او محصلانو چارو معینانو، د اړوندو ریاستونو رئیسانو او د مرکزي پوهنتونو رئیسانو او معاونينو ګډون کړی وو.
د لوړو زده کړو سرپرست وزیر او علمي معین پوهنمل عبدالتواب بالاکرزي، په رسمي جریده کې د لېسانس دورې د زده کړو مقررې خپريدو له امله د غونډې غړو او د هېواد اکاډميکې ټولنې ټولې کورنۍ ته مبارکي وویله او د لوړو زده کړو وزارت له رهبري هيئت او ټولو کارکوونکو څخه چې د دې مقررې په تدوین او چمتو کولو کې یې زیار ویستی مننه وکړه.
د لوړو زده کړو سرپرست وزیر وویل، چې د دې مقررې په پلي کېدو سره به په تحصیلي بنسټونو کې زیات شمېر سلیقوي مسایل رفع شي او د پوهنتونو زده کړه ييز سیسټم به له نړيوالو معیاري سیسټمونو سره برابر شي.
په یاده ناسته کې له اجنډا سره سم د خصوصي لوړو زده کړو نظام پر ښه والي او د دې بنسټونو د تحصيلي خدمتونو پر قانونمند کېدو تر بحث وروسته اړين تصامیم ونیول شول.
د لوړو زده کړو سرپرست وزیر د خصوصي لوړو زده کړو مؤسسو او پوهنتونو د معیاري او باکیفیته خدمتونو په وړاندې کولو تاکید وکړ او زیاته يې کړه، چې د لوړو زده کړو وزارت او خصوصي تحصيلي بنسټونو ترمنځ د تقنيني سندونو د پلي کولو په برخه کې ګډه همکاري د اوسنيو ستونزو د ختمېدو او په سيمه ییزه او نړيواله کچه د افغانستان د لوړو زده کړو نظام د باورمند کېدو لامل کيږي.
