د دیني جامعاتو او تخصصاتو لوی ریاست په ټولو وزارتونو کې د اسنادو ثبت دفترونه پرانېزي.

5/3/1401

24/10/1443

د دیني جامعاتو او تخصصاتو لوی ریاست په ټولو وزارتونو کې د اسنادو ثبت دفترونه پرانېزي.

په همدې مناسب جوړه شوې غونډه کې، چې د هېوادو بېلابېلو وزارتونو او لویو ریاستونو استازو په شمول د دیني جامعاتو او تخصصاتو لوی ریاست رئیسانو او مسؤلینو ګډون کړی وو، د قرانکریم په څو مبارکو ایاتونو سره پیل او راغلو مېلمنو ته د دیني جامعاتو او تخصصاتو رئیس مولوي سیف الدین حماد له لوري ښه راغلاست وویل شو.

په دې جوړه شوې غونډه کې د دیني جامعاتو او تخصصاتو د ارزیابۍ رئیس مولوي محمد داؤد حقاني بیا د یاد ریاست پر فعالیتونو، په وزارتونو کې د دفترونو په پرانېستلو او د نویو دفترونو پر چارو رڼا واچوله.

دغه راز د لوړو زده کړو وزارت د خصوصي محصلانو چارو رئیس محمد اسماعیل روحاني له لوري د اسنادو او فورمو ډولونو، د فورمو ارزیابۍ او معادلت، د فورمو لارښود تشریح او معلومات وړاندې شول.

د غونډې په وروستیو کې د ګډونوالو پوښتنو ته د مسؤلینو له لوري ځوابونه ورکړل شول او دغه غونډه د هېواد د اسلامي نظام د بقاء او تحصیلي نظام د پیاوړتیا په دعاء سره پای ته ورسېده.

د یادونې وړ ده چې په دې وروستیو کې د لوړو زده کړو وزارت تر چتر لاندې د دیني جامعاتو او تخصصاتو لوی ریاست د څلورو (د معتبرو دیني جامعاتو د ثبت ، د اسنادو د ارزیابۍ او معادلت ، د اسنادو تهیه او سوابقو د تنظیم او د تخصصاتو) ریاستونو په لرلو سره ایجاد شوی دی.