د رهبري شورا غونډه جوړه شوه
د لوړو زده کړو سرپرست وزیر په مشرۍ د رهبري شورا غونډه جوړه شوه
د لوړو زده کړو سرپرست وزیر اوعلمي مرستیال پوهنمل عبدالتواب بالاکرزي د غونډې په پېل کې د مرکزي ادارو د رییسانو د کړنو، اجراآتو او فعالیتونو راپور واورېد او بیا يې د غونډې په اجنډا بحث پېل کړ.
په دې ناسته کې د تسوید بورډ د جوړولو پر طرزالعمل، د حقوقي تقنیني سندونو پر تعدیل او بیاکتنه او همدارنګه د لوړو زده کړو وزارت د پالیسیو پر جوړولو، غیردولتي بڼسټونو سره د همکاریو د هوکړه لیکونو پر طرحې، د یو شمیر خصوصي پوهنتونو پر بیاځلي ارزونه او د دولتي پوهنتونو د اداري اجراآتو پر څرنګوالي بحث وشو او په پای کې د غونډې د غړو د رایو په اتفاق لازمې پریکړې وشوې.
په غونډه کې د خصوصي او دولتي پوهنتونو د محصلینو چارو رئیسانو د تحصیلي سندونو د الکټرونیکي سیسټم د مصؤن ساتلو، د چارو د ګړندیتوب او مؤثریت په اړه پرزنټيشن وړاندې کړ او په اړه يې د رهبري شورا د غړو نظرونه واخیستل.
د لوړو زده کړو سرپرست وزیر او علمي مرستیال پوهنمل عبدالتواب بالاکرزي د بیلابیلو مسایلو تر ارزونې وروسته ډاډ ورکړ چې ټولو اداري اړتیاوو ته به رسیدګي وشي او د محصلینو د تحصيلي سندونو د برښنایي سیسټم د مؤثریت او مصؤنیت لپاره به لازم اقدامات پر لاره واچوي.
د لوړو زده کړو وزیر د کار د پرمختګ او د خدمتونو د ښه چمتو کولو له امله د مننې ترڅنګ، ټولو چارواکو ته لازمې لارښوونې وکړې ترڅو هیوادوالو ته په علمي او اداري برخو کې لا ښه خدمتونه وړاندې کړي.
