د لوړو زده کړو سرپرست وزیر د غزني پوهنتون محصلینو په فراغتغونډه کې د ګډون تر څنګ، په دغه پوهنتون کې د ۳۶ میلیونه افغانیو په لګښت يوه پروژه افتتاح او دوې نورې ګټې اخیستنې ته وسپارلې

د لوړو زده کړو سرپرست وزیر محترم شیخ الحدیث مولوي نداء محمد ندیم غزني ولایت ته د خپل رسمي سفر په ترڅ کې د غزني پوهنتون پنځو پوهنځيو څخه د ۳۹۰ تنو محصلینو په فراغتغونډه کې د ګډون او وینا تر څنګ، په دغه پوهنتون کې د ۳۶ میلیونه افغانیو په لګښت يوه پروژه افتتاح او دوې نورې ګټې اخیستنې ته وسپارلې.

په غزني پوهنتون کې په همدې مناسبت جوړه شوې غونډه کې د لوړو زده کړو سرپرست وزیر سربېره د ا.ا.ا استخباراتو لوی ریاست رئیس، د ماليې وزارت سرپرست وزیر، د غزني ولایت والي، د جهادي مدرسې مهتمم، د ولایتي ادارې مسؤلینو، علماء کرامو، سپین ږیرو، استادانو، محصلینو او د محصلینو د کورنیو غړو ګډون کړی و. 

په یاده غونډه کې د لوړو زده کړو سرپرست وزیر محصلینو ته وویل چې د نورو ډلو د مفکورو تر اغېزې لاندې رانشي، خپلو لوړو زده کړو ته دوام ورکړي او په لېسانس زده کړو اکتفاء ونکړي. 

نوموړي زیاته کړه چې افغانستان د فوق لېسانس زده کړو متخصصینو او غوره فکر لرونکو ځوانانو ته اړتیا لري او له محصلینو یې وغوښتل چې خپلو زده کړو ته متوجه شي. 

همدارنګه د ا.ا.ا د استخباراتو لوی ریاست رئیس ملا عبدالحق وثیق، د ماليې سرپرست وزیر ملا محمد ناصر اخند او د غزني ولایت والي ملا عبدالصمد جاوید په خپلو خبرو کې فارغو شویو محصلینو ته د مبارکۍ تر څنګ، هغوی لا نورو لوړو زده کړو ته وهڅول. 

دغه راز د لوړو زده کړو سرپرست وزیر د غزني پوهنتون، غزني ولایتي ادارې مسؤلینو او نورو مشرانو په ملتیا، په غزني پوهنتون کې د ۱۱ میلیونه افغانیو په لګښت د لیلیې تجهیزاتو پروژه، چې البسه، چپرکټونه او نور اړین وسایل پکې شامل دي او د ۶ میلیونه افغانیو په ارزښت د لیلیې خوړنځای پروژه له بشپړېدو وروسته ګټې اخیستنې ته وسپارلې او همدا راز د ۱۹ میلیونه افغانیو په ارزښت یې د څېړنیز فارم د جوړېدو پروژه افتتاح کړه. 

نټه: پنجشنبه

۱۴۴۷هـ.ق، د صفرالمظفر ۱۳مه

۱۴۰۴هـ.ش، د زمري ۱۶مه

۲۰۲۵م، د اګېسټ ۷مه