د شهید امیرالمؤمنین ملا اختر محمد منصور (تقبله الله) د شپږم تلین په اړه د لوړو زده کړو وزارت د تسلیت پیغام!
د شهید امیرالمؤمنین ملا اختر محمد منصور (تقبله الله) د شپږم تلین په اړه د لوړو زده کړو وزارت د تسلیت پیغام!
د شوروي او امریکایي اشغال پر وړاندې مبارزه څېره، جید عالم، تکړه مجاهد، د اسلامي نړۍ او افغان مظلوم ولس خواخوږی امیرالمؤمنین ملا اختر محمد منصور (تقبله الله) شپږ کاله وړاندې په همدې ورځ د کندهار او بلوچستان تر منځ په سرحدي سیمه کې د امریکایي اشغالګرو له لوري په مظلومانه ډول په شهادت ورسېد.
ملا اختر محمد منصور (تقبله الله) د الحاج محمد جان زوی په ۱۳۴۷هـ.ش کال کې د کندهار ولایت میوند ولسوالۍ د بند تیمور سیمې په یوه روحاني کورنۍ کې زیږېدلی دی. نوموړي خپلې ابتدایي دیني زده کړې د خپلې سیمې په جومات او مدرسو کې ترسره کړي، وروسته یې د هجرت پر مهال د بلوچستان د سیمې په مدارسو کې خپلو دیني زده کړو ته دوام ورکړ. له هغې وروسته کویټې ښار او بیا هم خان کراس سیمې ته ولاړ او د هغې ځای په مدرسو کې یې دیني کتابونه ولوستل. وروسته ملا محمد منصور (تقبله الله) د دیني علومو په خاطر پېښور ته ولاړ هلته یې په کچه ګړۍ او نورو سیمو کې دیني درسونه وویل او وړه دوره یې د پېښور د جلوزو په کمپ کې تکمیل کړه.
دغه راز کله چې په ۱۹۷۸م، کال کې پخواني شوري اتحاد پر افغانستان تیری وکړ، نوموړي یې پر وړاندې جهاد پیل کړ. همدارنګه د ا.ا.ا د لومړي دور حاکمیت پر مهال، د پوځي فعالیتونو تر څنګ، د کندهار د هوايي ډګر مسؤل، په کندهار کې د هوايي ځواکونو او هوايي مدافعې مسؤل او د هوانوردۍ وزارت د وزیر په توګه یې دندې ترسره کړي دي.
ملا محمد منصور (تقبله الله) د اسلامي امارت لومړي دور حاکمیت له سقوط وروسته د امیرالمؤمنین ملا محمد عمر مجاهد (تقبله الله) د مرستیال او د نوموړي له شهادت وروسته د اسلامي امارت د رهبر په توګه وټاکل شو، خو دغه وخت امریکا او ناټو افغانستان اشغال کړی و او د هغوی پر وړاندې په مبارزه کې یې ډېرې ستړې وګاللې. الله تعالی دې د هغه ټول جهادونه او ستړې په خپل دربار کې قبولې او منظوري کړي.
د لوړو زده کړو وزارت رهبري د نوموړي روح ته د دعا لاسونه لپه کوي او د افغانستان لپاره یې ستره ضایعه بولي.
په درنښت
د لوړو زده کړو سرپرست وزیر
الحاج مولوي عبدالباقي حق اني
