د غزني تخنیکي پوهنتون څخه ۱۲۰ تنه انجینران فارغ شول
په دغو مراسمو کې چې د لوړو زده کړو وزارت مشرتابه پلاوي، د غزني ولایت مسوولینو، د پوهنتون مشرتابه پلاوي او د محصلانو کورنیو برخه اخیستې وه، د لوړو زده کړو وزیر شیخ الحدیث مولوی نداء محمد ندیم محصلانو ته د مبارکۍ ترڅنګ وویل: «د هېواد راتلونکی په تاسو پورې اړه لري، د خپلو ملي او دیني مسولیتونو په پام کې نیولو سره د هېواد په ابادۍ او پرمختګ کې برخه واخلئ».
هغه زیاته کړه چې، د افغانستان اسلامي امارت مشرتابه د هیواد پرمختګ او هوساینې ته ژمن دی او د اسلامی شریعت پر اساس هېوادوالو ته خدمتونه وړاندي کوي.
سرپرست وزیر وویل، د ملت د دین او دنیا په ساتنه کې د نظام د بریالیتوب راز دا دی چې زموږ قانون او لارښونه د خدای پاک سپیڅلی کتاب دی، په دغه لاره کې باید استقامت ولرو، د نورو د ګټو لپاره خپله مقدسه لاره بدله نه کړو.
ورپسې د یاد پوهنتون مشرتابه پلاوي او نورو ویناوالو خبرې وکړې او فارغو شویو محصلانو ته يې د مبارکۍ ترڅنګ هغوی د هېواد پرمختګ او ابادۍ ته وهڅول.
