د فراه په لوړو زده کړو موسسه کې د محصل نړیواله ورځ ولمانځل شوه
د فراه لوړو زده کړو موسسې رییس پوهنیار عزیزالله بشارت د محصل نړيواله ورځ په مناسبت ټولو محصلينو ته مبارکۍ وویله او د محصل پر مقام يې هر اړخیزې خبرې وکړې. نوموړي په دې خاطر چې د فراه د لوړو زده کړو موسسې اکثريته فارغان په دولتي نهادونو کې مقرر شوي دي، خوښي څرګنده وکړه.
همدارنګه د فراه والي سترجنرال تاج محمد جاهد خپله وینا د محصلینو لپاره د کاري زمینې پر برابرولو، د فراه ولایتي شورا رییس الحاج دادالله قانع په ټولنه کې د محصل پر رول او نورو ګډونوالو د محصل د ورځې په پار خپلې ويناوې، مقالې او شعرونه ولوستل.
غونډه د ټولګیو د ممتازو، مبتکرو او خلاقو محصلینو د تشويق او ترغیب په موخه د ستاینليکونو او ډالیو پر ویشلو پای ته ورسیده.
