د لوړو زدهکړو وزارت پر یاد پوهنتون د وروستي ترهګریز برید په اړه خبري ناسته ترسره کړه
د لوړو زدهکړو وزارت او کابل پوهنتون یوشمېر مسوولینو نن پر یاد پوهنتون د وروستي ترهګریز برید په اړه خبري ناسته ترسره کړه.
د لوړو زده کړو وزارت مالي او اداري مرستیال ښاغلي نور احمد دروېش په دغه ناسته کې وویل چې ډېر ژر به د هیواد ټولو دولتي پوهنتونونو د امنیت لاخوندي توب په اړه روښانه برنامې جوړې شي. ښاغلي دروېش د خپلو خبرو په لړ کې له امنیتي ځواکونو څخه مننه وکړه او ویې ویل چې د لوړو زده کړو وزارت دټولو دولتي پوهنتونونو د امنیت لاښه خوندیتوب لپاره په یوه طرح کار کوي.
له دې سره د کابل پوهنتون د محصلانو چارو مرستیال پوهندوی فیصل امین هم له خبریالانو سره د یادې ترهګریزې پېښې د شهیدانو او ټپیانو وروستی شمېر شریک کړ.
ښاغلي امین زیاته کړه چې زده کړیالان کولای شي بېرته په عادي ډول خپلو درسونو ته دوام ورکړي او داسې بریدونه د زده کړیالانواو علمي کهول مخه نشي نیولای.
دا په داسې حال کې ده چې یوشمېر ترهګرو د لړم په ۱۲مه د کابل پر پوهنتون ترهګریز برید وکړ چې په پایله کې یې د یوه کارکوونکي په ګډون نولس تنه شهیدان او ۳۸ نور ټپیان شول.
