د لوړو زده کړو سرپرست وزير د هرات پوهنتون څلور تنو فارغانو ته د ماسټرۍ بورسونه ورکړل
د لوړو زده کړو وزارت سرپرست نوماند وزیر د هرات پوهنتون څلورو تنو محصلینو ته چې د هالت پرایز(Hult prize) د نړیوالو سیالیو په پروګرام کې يې شپږم مقام خپل کړی و د ماسترۍ بورسونه ورکړل.
د لوړو زده کړو سرپرست نوماند وزیر ډاکټر عباس بصیر په نړیوالو سیالیو کې د شپږم مقام ګټونکو محصلانو ته د بریا د مبارکۍ ویلو ترڅنګ وویل: د لوړو زده کړو وزارت نوې رهبري دهیواد د ځوانانو استعدادونو څخه ملاتړ کوي، هڅوي يې او د هغوی د لوړو زده کړو لارې ورته برابروي. د لوړو زده کړو وزارت سرپرست له هغوی وغوښتل چې لوړې موخې ولري او موخو ته د رسیدو په پار له هیڅ راز هلوځلو څخه ځان ونه ساتي.
ډاکټر عباس بصیر د هرات پوهنتون محصلانو ته د ماسترۍ د پروګرام د بورسونو ورکولو پرمهال وویل: له هیواده بهر د زده کړو پر مهال د د افغانستان نوم لوړ کړي.
د یادونې وړ ده، چې د هالت پرایز(Hult prize) رقابتي پروګرام د امریکا تر ملاتړلاندې د هرات په پوهنتون کې دایره شوی وو، چې د ۲۰۵ ګډونکونکو ټیمونو له منځ څخه ۶۵ ټیمونه د لویو اقتصادي او چاپیریالي طرحو پر وړاندې کولو سره د سیالیو لپاره ټاکل شوي وو، په پای کې د هرات پوهنتون د محصلانو ټیم د نړۍ د ۵۳ ډلو له منځ څخه د تایلینډ په بانکوک کې شپږم مقام خپل کړی دی.
