د لوړو زده کړو سرپرست وزیر د لوګر لوړو زده کړو مؤسسې په علمي شورا کې د ګډون تر څنګ، د دغه تحصیلي بنسټ له بېلا بېلو برخو څخه لیدنه وکړه.
د لوړو زده کړو سرپرست وزیر شیخ الحدیث مولوي نداء محمد ندیم صاحب لوګر ولایت ته د خپل رسمي سفر په ترڅ کې، د لوګر لوړو زده کړو مؤسسې په علمي شورا کې د دغې مؤسسې د مسؤلینو او استادانو ستونزې او وړاندیزونه واورېدل.
نوموړي په یاده شورا کې د استادانو پر ظرفیت لوړونه ټينګار وکړ او له مؤسسې څخه پوهنتون ته د ارتقاء په برخه کې یې د لوګر لوړو زده کړو مؤسسې د مشرتابه او استادانو هڅې وستایلې او د شرایطو په پوره کولو سره د دې علمي ارتقاع د همکارۍ ژمنه ورسره وکړه.
دغه راز د لوړو زده کړو سرپرست وزیر د یادې مؤسسې د مسجد، داخلي سړکونو، حوېلۍ اوارولو، غونډو تالار، کتابتون، څېړنو مرکز او خوړنځای جوړولو او همدا راز لابراتوار د تجهیز په برخه کې د اړتیاوو پوره کولو او ستونزو د حل ډاډ ورکړ او مسؤلینو ته یې سپارښتنه وکړه چې پر عاجلو اړتیاوو کار پیل کړي.
همدارنګه سرپرست وزیر د لوګر لوړو زده کړو مؤسسې له مختلفو برخو څخه لیدنه وکړه او د زیربنایي کارونو اړوند یې مسؤلینو ته لازمې لارښوونې وکړې.
د یادونې وړ ده چې لوګر د لوړو زده کړو مؤسسه اوسمهال د کرنې، تعلیم او تربیې، جیولوژي معدن او شرعیاتو په برخو کې څلور پوهنځی لري او هر کال د ټولنې د خدمت لپاره سلګونه مسلکي کسان روزي.
هېره دې نه وي چې د لوګر لوړو زده کړو مؤسسې مشرتابه د دغې مؤسسې د علمي مجلې لومړنۍ چاپ شوې ګڼه، د لوړو زده کړو سرپرست وزیر ته ډالۍ کړه.
