د لوړو زده کړو سرپرست وزیر د پاکستان له سفیر سره ولیدل
د لوړو زده کړو سرپرست وزیر د پاکستان له سفیر سره پر دوه اړخیزو علمي او تحصیلي همکاریو خبرې وکړې.
د لوړو زده کړو سرپرست وزیر الحاج مولوي عبدالباقي حقاني د پاکستان له سفیر منصور احمد خان سره په داسې حال کې ولیدل، چې د دغه وزارت معینانو هم حضور درلود.
د لوړو زده کړو سرپرست وزیر په تحصلي برخو کې د پاکستان له همکاریو مننه وکړه او په پاکستان کې یې د افغان زده کړیالانو د ستونزو د حل او همدارنګه په هغه هېواد کې د مېشتو افغان مهاجرو ځوانانو ته د لوړو زده کړو د زمینې برابرولو غوښتنه وکړه او همدارنګه ښاغلي وزیر د پاکستان له سفیر څخه د هغو سکالرشیپونو په اړه جزئیات وغوښتل، چې افغان زده کړیالانو ته یې ورکوي.
همدرانګه په کابل کې د پاکستان سفیر منصور احمد خان په تحصیلي برخو کې له افغانستان سره د مرستو او افغان زده کړیالانو ته د سکالرشیپونو د ورکولو ژمنه وکړه. هغه وویل چې افغانستان او پاکستان ګډې مذهبي او کلتوري اړیکې لري.
د یادولو وړ ده چې په دغه لیدنه کې د پاکستان سفیر، د لوړو زده کړو وزیر په مشرۍ یوه تخنیکي ټیم ته په هغه هېواد کې د تحصیلي چارو په باب له اړوندو اړخونو سره د لیدنې او ستونزو شریکولو په موخه، پاکستان ته د سفر بلنه ورکړه.
