د لوړو زده کړو سرپرست وزیر د پاکستان له سفیر سره وکتل
د لوړو زده کړو سرپرست وزیر پوهنمل عبد التواب بالا کرزي د پاکستان له سفیر سره وکتل.
په دې لیدنه کې دواړو خواوو په علمي او فرهنګي مرستو، د لوړو زده کړو وزارت له لارې د پاکستان د بورسونو مدیریت او تنظیم او د دواړو هيوادونو د لوړو زده کړو وزارتونو ترمنځ د علمي او اکاډمیکو مرستو د پراخوالي په اړه خبرې وکړې او د افغانستان د لوړو زده کړو وزیر څخه وغوښتل شول چې د همکاریو د لا پراخوالي په موخه پاکستان ته سفر وکړي او له خپل سیال وزیر سره وګوري.
د لوړو زده کړو سرپرست وزیر پوهنمل عبدالتواب بالاکرزي د پاکستان دولت له مرستو څخه د مننې په ترڅ کې وویل چې د افغانستان خلک د پاکستان مرستو ته په ځانګړې توګه د هجرت په دیار کې په درنه سترګه ګوري.
د لوړو زده کړو سرپرست او علمي مرستیال زیاته کړه چې هغه علمي او فرهنګي تفاهمنامې چې په تیر وخت کې د دواړو هيوادونو ترمنځ امضاء شوې دي، د هغوی د علمي پلانونو او فعاليتونو په اړه باید زیاته توجه وشي.
نوموړي په دې لیدنه کې د پاکستان دولت د کلنيو بورسونو مدیریت او تنظیم ته په اشارې سره وویل، چې د یاد هیواد بورسونه باید د افغانستان د لوړو زده کړو وزارت له لوري، مدیریت او د دې هېواد خلکو ته وویشل شي.
کابل میشت د پاکستان سفیر زاهد نصرالله خان له افغانستان سره د بیلا بیلو برخو په ځانګړي ډول لوړو زده کړو په اړه د خپل هیواد د مرستو په باره کې خبرې وکړي او ويې ویل چې پاکستان له لوړو زده کړو وزارت سره د زیاتو مرستو کولو غوښتونکی دی.
نوموړي د دواړو هیوادونو د علمي او فرهنګي مرستو پراخوالي ته اشاره وکړه او د لوړو زده کړو وزارت سرپرست یې دعوت کړ چې د دواړو هيوادونو ترمنځ د اړیکو د پراختیا په خاطر پاکستان ته سفر وکړي.
