د لوړو زده کړو سرپرست وزیر سره د ترکیې پلاوي ناسته ترسره کړه

د لوړو زده کړو سرپرست وزیر سره د ترکیې پلاوي ناسته ترسره کړه.

یکشنبه، ۲۲ کب ۱۴۰۰
په دې ناسته کې د لوړو زده کړو سرپرست وزیر مولوي عبدالباقي حقاني، د لوړو زده کړو وزارت علمي معین دوکتور لطف الله خیرخوا، د کابل پوهنتون رئیس دوکتور اسامه او د ترکیې د YTB ریاست مرستیال سید یوسف، تعلیمي مشاور جنګیز ای دمیر، پروفیسور رمضان جوشګون او د ترکیې د معارف بنسټ د افغانستان د څانګې رئیس صالح ساغر ګډون کړی وو.

په دې ناسته کې د لوړو زده کړو سرپرست وزیر مولوي عبدالباقي حقاني وویل، د هېواد پرمختګ د دیني او عصري علومو معیاري کولو پورې تړلي دي او په دې برخه کې یې د ترکیې همکاري ځکه اړینه وبلله چې ترکیه د اسلامي اُمت قیادت لري.
سرپرست وزیر دغه راز زیاته کړه، د ترکیې بورسونو ته ځکه خوشبین یوو، چې کومه سیاسي موخه نه لري او د تېر په نسبت به بورسونه په شفاف ډول وړ کسانو ته ورکول کېږي.
همدارنګه ښاغلي حقاني، د محصلینو، استادانو او دوه اړخېزه تحصیلي همکاریو غوښتنه وکړه.

بل لورته د YTB ریاست مرستیال سید یوسف د لوړو زده کړو سرپرست وزیر ته د هر ډول همکارۍ ډاډ ورکولو ترڅنګ وویل، په تحصیلي برخه کې زموږ او ستاسې موخه یوه ده، خو اوس ځیني ستونزې شته چې په ګډه به یې حلوو.
دغه راز نوموړي د افغان محصلینو لپاره د لېسانس، ماسټرۍ او دوکتورا ترکچې د بورسونو ورکړې ژمنه وکړه.

د یادونې وړ ده چې د لوړو زده کړو سرپرست وزیر تر دې وړاندې هم د ترکیې له یو شمیر مسؤلینو سره ناستې ترسره کړې دي، چې ګټورې وي.