د لوړو زده کړو وزارت د رهبري شورا غونډه جوړه شوه
د لوړو زده کړو وزارت د رهبرۍ شورا غونډه د لوړو زده کړو سرپرست وزیر په مشرۍ ترسره شوه.
د لوړو زده کړو سرپرست وزیر او علمي مرستیال پوهنمل عبدالتواب بالاکرزي د غونډې په پیل کې د وزارت د ټولو مرکزي ادارو د کاري کړنو او فعالیتونو د څرنګوالي راپورونه واوریدل او بیا یې د نننۍ ناستې پر اجنډا بحث او خبرې وکړې.
په دې ناسته کې د استادانو په تقرر، علمي ترفیعاتو، د علمي کادر غړو د بورسونو د ستونزو پر حل کولو، تقنیني اسنادو او د مراجعینو لپاره د لازمو آسانتياوو او د اداري چارو د روڼتیا په هکله پریکړې او بحث وشو .
د لوړو زده کړو وزارت سرپرست په دې ناسته کې، د یاد وزارت لپاره د تهیې او تدارکاتو نوی رئیس معرفي کړ او ویې ویل: ښاغلی عبد الله صوفي زاده د اداري اصلاحاتو او ملکي خدمتونو د خپلواک کمیسیون په رقابتي پروسه کې تر ټولو لوړو نمرو اخیستلو سره، د تهیې او تدارکاتو ریاست ته بریالی اعلان شو او د کمیسیون له لوري د لوړو زده کړو وزارت ته ور وپیژندل شو.
نوموړی د لوړو زده کړو وزارت له ټولو مرکزي رئیسانو او د تدارکاتو له کارکوونکو څخه وغوښتل چې په اداري او تدارکاتي چارو کې د نوي رئیس سره بشپړه مرسته وکړي.
پوهنمل عبدالتواب بالاکرزي د یاد ریاست پخواني سرپرست رېیس محترم الله محمد سلیم د فعالیتونو یادونه وکړه او د ستاینلیک په ورکولو سره یې هغه ته په خپلو چارو کې د لا زیاتو بریاوو غوښتونکی شو.
د تهیې او تدارکاتو نوي رئیس، عبدالله صوفي زاده د لوړو زده کړو وزارت د رهبرۍ پلاوي د توجه، او د نوموړي د ټاکلو په بهیر کې د رو ڼتیا د تأمین له امله مننه وکړه. او ژمنه یې وکړه چې د وزارت د چارو پرمخ وړلو کې به له هیڅ ډول هلو ځلو څخه دریغ ونکړي.
وروسته ښاغلی عبدالله صوفي زاده د لوړو زده کړو وزارت د مالي او اداري مرستیال له لوري تر خپل کاري دفتره پوري بوتلل شو او د یاد ریاست کارکوونکو ته ور ورپیژندل شو.
